کراچی میں ڈکیتی کی وارداتوں میں بے پناہ اضافہ ہوگیا ہے۔

ذرائع کے مطابق بلوچ کالونی میں ایڈیشنل سیشن جج نوید حسین کو اہل خانہ سمیت لوٹ لیا گیا۔

واقعے کا مقدمہ تھانہ بلوچ کالونی میں 2 مسلح نامعلوم ملزمان کے خلاف درج کرلیا گیا ہے۔

ایف آئی آر کے مطابق دومسلح ملزمان ایڈیشنل سیشن جج اور ان کی فیملی سے موبائل فونز چھین کو فرار ہوئے۔

پولیس کا کہنا ہےکہ مقد مہ درج کرکے ملزمان کی تلاش شروع کر دی گئی ہے۔

اس کے علاوہ دستگیر ایف بی ایریا بلاک چودہ میں چھ سے زائد مسلح ملزمان نے ہیئر ڈریسر کی دوکان پر واردات کی۔

ملزمان دوکان پر واردات کرنے کے بعد اندھا دھند فائرنگ کرکے فرار ہو گئے،اس دوران ملزمان کی فائرنگ سے ایک راہ گیر ہلاک اور دو افراد زخمی ہوئے ۔

شہریوں کا کہنا ہے کہ ملزمان نے بیس سے زائد فائر کیے اور با آسانی جائے وقوعہ سے فرار ہونے میں کامیاب ہو گئے۔

پولیس حکام کا کہنا ہے کہ جاں بحق ہونے والے شخص کی شناخت سلمان ولد ابراہیم کے نام سے ہوئی ہے۔

تفتیشی حکام کے مطابق جاں بحق سلمان آئی ٹی کمپنی میں منیجر تھا، جوکہ فلٹر پلانٹ سے پانی لینے گیا تھا اور ملزمان کی فائرنگ کی زد میں آکر موقع پر ہی جان کی  بازی ہار گیا۔

وقوعہ سے پولیس نے متعدد گولیوں کے خول اور ایک میگزین بر آمد کیا ہے۔

علاقہ مکینوں کا کہنا ہےکہ گزشتہ روز سے اب تک علاقہ میں 9 مختلف وارداتیں ہوئی ہیں۔

ذرائع کے مطابق جوہر آباد کے علاقے میں بھی خواتین سے قیمتی سامان لوٹا گیا۔

شہریوں نے بتایاکہ جوہر آباد میں پولیس کی کارکردگی بالکل نظرنہیں آتی جبکہ پولیس نے علاقے کو ڈاکوؤں کے رحم وکرم پرچھوڑ دیا ہے۔

شہریوں نے مطالبہ کیا کہ علاقے میں فوری طور پر بیریئر لگائے جائیں، گلیوں میں روشنیوں کا فوری طور پر بندوبست کیا جائے اور پولیس کے گشت کوبھی یقینی بنایا جائے۔