پاکستان نے کرتارپور میں سکھوں کے مذہبی مقام گُردوارہ دربار صاحب پر ہونے والے واقعے پر بھارتی واویلے اور منفی پراپیگنڈے کو مسترد کردیا۔

ترجمان دفتر خارجہ کا کہنا ہے کہ بھارت کی گُردوارے پر پیش آئے واقعے پر منفی مہم انتہائی مضحکہ خیز ہے۔

واقعے پر منفی مہم کے حوالے سے ترجمان دفترخارجہ نے بتایا کہ بھارتی ہائی کمیشن کے سینئر سفارتکار کو دفترخارجہ طلب کیا گیا ہے۔

پاکستان نے بھارت کی جانب سے کئے گئے شور شرابے کو مسترد کرتے ہوئے بھارتی سفارتکار کو پراپیگنڈے پر تحفظات سے آگاہ کیا۔

ترجمان دفتر خارجہ نے کہا کہ پاکستان اقلیتی برادری کےحقوق اور مذہبی مقامات کے تقدس کا خیال رکھتا ہے۔

دفترخارجہ کے ترجمان کا کہنا تھا کہ اقلیتوں کے لیے غیر محفوظ اور بدنام ترین بھارت کو اقلیتوں کے حقوق کی بات کرنا زیب نہیں دیتا۔

معاملہ کیا ہے؟

کرتار پور میں واقع سکھ برادری کے مذہبی مقام گُردوارہ دربار صاحب پر ایک خاتون نے بنا سر ڈھانپے ماڈلنگ کے انداز میں کچھ تصاویر بنوائیں۔ جنہیں ایک بھارتی صحافی نے سکھوں کے مذبی مقام کی توہین قرار دیا۔

معاملہ وزیراعلیٰ پنجاب سردار عثمان بزدار کے نوٹس میں آیا تو انہوں نے واقعے کی تحقیقات کا حکم دیا، جبکہ وزیراطلاعات فواد چوہدری نے بھی واقعے کی مذمت کرتے ہوئے اس پر تنقید کی۔

بعد ازاں جس فیشن برانڈ پر ماڈلنگ شوٹ کے انعقاد کا الزام لگایا گیا تھا، اس کی جانب سے بھی تردید سامنے آئی اور کہا گیا کہ مذکورہ خاتون کا فیشن برانڈ سے کوئی تعلق نہیں۔