وفاقی دارالحکومت اسلام آباد میں اسکول بند رکھنے کا فیصلہ برقرار ہے۔

 تفصیلات کے مطابق آرڈیننس کے ذریعے اسلام آباد کے تعلیمی ادارے میونسپل کارپوریشن کے ماتحت کرنے کے معاملے پر فیڈرل گورنمنٹ ایجوکیشن جوائنٹ ایکشن کمیٹی کا اسکول بند رکھنے کا فیصلہ برقرار ہے۔

جوائنٹ ایکشن کمیٹی کا کہنا ہے کہ جب تک آرڈیننس واپس نہیں لیا جاتا اسکولوں کی بندش جاری رہے گی۔

انہوں نے کہا کہ ہمیں مجبور کیا گیا کہ ہم اسکول بند کریں، اسلام آباد کے 390 ادارے ایک آرڈیننس کے ذریعے میئر کے ماتحت کر دیئے گئے ہیں۔

 جوائنٹ ایکشن کمیٹی نے کہا کہ آرڈیننس کا مقصد آہستہ آہستہ تعلیمی اداروں کی نجکاری ہے، اساتذہ نے بڑے صبر سے کام لیا ہر فورم پر آواز اٹھائیں گے۔

انکا کہنا ہے کہ آرڈیننس کی کلاز 166 واپس لینے کا مطالبہ کرتے ہیں، جوائنٹ ایکشن کمیٹی کے اگلے لائحہ عمل تک اساتذہ بائیکاٹ پر رہیں گے۔

جوائنٹ ایکشن کمیٹی نے مزید کہا کہ آرڈیننس پر عجلت میں سے لیا گیا اسٹیک ہولڈر سے مشاورت نہیں کی گئی، اس وجہ سے انہیں یہ شق ضرور واپس لینی پڑے گی۔

واضح رہے کہ چیئرمین ایکشن کمیٹی جناب فضل مولا صاحب نے ایکشن کمیٹی کی میٹنگ کا اعلان کیا ہے جس میں آئندہ کا لائحہ عمل پیش کیا جائے گا۔

جوائنٹ ایکشن کمیٹی نے کہا کہ ہم ایک دن بھی اپنے تعلیمی اداروں سے غیر حاصل نہیں رہے، احتجاج و بائکاٹ ہمارا جمہوری و آئینی حق ہے، آج بھی تمام اسٹاف اپنے اداروں میں بروقت حاضر رہے گا۔

انہوں نے کہا کہ تعلیمی ادارے کھلے رہیں گے مگر کلاسز کا بائیکاٹ رہیگا، اپنے اپنے اداروں کے باہر اکھٹے ہو کر بینر کے ہمراہ احتجاج جاری رکھیں گے۔

جوائنٹ ایکشن کمیٹی نے مزید کہا کہ تمام ہیڈ صاحبان پی ٹی اے (اسکول منیجمنٹ کمیٹی و کالج مینجمنٹ کمیٹی) کے عہدیداران کا اجلاس بلا کر ان کو اعتماد میں لیں گے۔