سپریم کورٹ نے اسپیکر سندھ آغا سراج درانی کو نیب کے سامنے سرنڈر کرنے کا حکم دے دیا۔ 

سپریم کورٹ میں اسپیکر سندھ اسمبلی آغا سراج درانی کی ضمانت سے متعلق کیس کی سماعت ہوئی۔ جسٹس عمر عطاء بندیال کی سربراہی میں 3 رکنی بینچ نے کیس کی سماعت کی۔

عدالت نے آغا سراج درانی کے وکیل کی جانب سے ٹرائل کورٹ کے سامنے سرنڈر کرنے کی استدعا مسترد کرتے ہوئے کہا کہ اسپیکر سندھ اسمبلی پہلے سندھ ہائی کورٹ کے حکم پر عمل کریں۔

جسٹس عمرعطا بندیال نے اپنے ریمارکس میں کہا کہ ٹرائل کورٹ کے سامنے سرنڈر کرنے کا حکم نہیں دے سکتے، ہم نے قانون کے مطابق چلنا ہے۔

جسٹس سجاد علی شاہ نے اپنے ریمارکس میں کہا کہ آغا سراج درانی پہلے نیب اتھارٹی کو سرنڈر کریں، سرنڈر کریں گے تو آپ کی درخواست ضمانت قبول کرلیں گے۔

اس موقع پر آغا سراج درانی کے وکیل نے جواب دیا کہ عدالت کے سامنے موکل نے سرنڈر کر دیا ہے، کم از کم ٹرائل کورٹ کے سامنے سرنڈر کرنے کی اجازت دیدیں۔

جس پر جسٹس سجاد علی شاہ نے ریمارکس دیے کہ اس طرح کے سرنڈر کو عدالت نہیں مانتی اور جسٹس منصور علی شاہ نے کہا کہ ملزم نے نیب کے سامنے سرنڈر نہیں کیا۔ عدالت نے کہا کہ ہائی کورٹ سے ضمانت خارج ہونے کے ضمانت بعد از گرفتاری کیسے کی گئی۔

بعد ازاں سپریم کورٹ کی جانب سے حکم جاری کیا گیا کہ اسپیکر سندھ اسمبلی آغا سراج درانی نیب کے سامنے سرنڈر ہوں۔

دوسری جانب میڈیا سے بات کرتے ہوئے اسپیکر سندھ اسمبلی کا کہنا تھا کہ ہم قانون کی پیروی کرتے ہیں، ہماری قیادت نے ہمیں قانون کی پاسداری سکھائی ہے، ہائی کورٹ سے سپریم کورٹ ریلیف لینے کے لیے آئے ہیں اور عدالتی حکم ہمیشہ مانتے ائے ہیں، عدالتوں میں پہلی بار نہیں آئے۔

صحافی نے سوال کیا کہ آپ گرفتاری یہاں دیں گے یا سندھ جا کر دیں گے۔ جس پر آغا سراج درانی نے جواب دیا کہ عدالت سے باہر نکلیں گے تو پتا چلے گا کہاں سے گرفتار ہونا ہے۔

ایک اور سوال کے جواب میں انہوں نے کہا کہ اسمبلی کا اجلاس نہیں بلا سکتا،اسمبلی اپنے طریقہ کار سے چلتی ہے۔

کیس کا پس منظر

قومی احتساب بیورو (نیب) کی جانب سے اسپیکر سندھ اسمبلی پر الزام عائد کیا گیا ہے کہ انہوں نے غیر قانونی آمدن سے اپنے بچوں کے نام پراپرٹی خریدی ہے جس پر آغا سراج درانی نے اپنی درخواست ضمانت کے لیے عدالت سے رجوع کیا۔

سندھ ہائی کورٹ نے اسپیکر سندھ اسمبلی سمیت 11 ملزمان کی درخواستِ ضمانت مسترد کر دی  جب کہ نیب ٹیم نے آغا سراج درانی کی گرفتاری کے لیے چھاپے بھی مارے لیکن روپوش ہو گئے تھے۔

بعد ازاں  آغا سراج درانی نے آمدن سے زائد اثاثہ جات کیس میں ضمانت کے لیے سپریم کورٹ سے رجوع کرلیا۔