ملتان سمیت جنوبی پنجاب میں ڈینگی کے کیسز میں اضافہ ہوا ہے۔

تفصیلات کے مطابق ملتان نشتر اسپتال میں ڈینگی کے 3 نئے مریض رپورٹ ہوئے ہیں۔

نشتراسپتال کے ترجمان کا کہنا ہے کہ نشتر اسپتال میں ڈینگی وارڈ میں6 مریض زیرعلاج ہیں۔

نشتراسپتال کے ترجمان نے بتایا ہے کہ زیرعلاج 3 مریضوں میں ڈینگی کی تصدیق جبکہ 3 مریض کی رپورٹ کا انتظار ہے۔

خیال رہے کہ ڈینگی میں مبتلا مریضوں کا تعلق جنوبی پنجاب سے ہے۔

واضح رہے کہ صوبہ خیبرپختونخوا میں بھی تاحال ڈینگی وائرس کے وار جاری ہیں۔

تفصیلات کے مطابق پچھلے 24 گھنٹوں کے دوران ڈینگی کےمزید 21 نئے کیسز رپورٹ ہوئے ہیں جبکہ صوبہ میں ڈینگی کے مریضوں کی تعداد 10 ہزار507 ہوگئی ہے۔

اسکے علاوہ صوبے کے مختلف ہسپتالوں میں ڈینگی کے17 مریض زیرعلاج ہیں اور ڈینگی سے اب تک 10 اموات ہوچکی ہیں۔

 ڈینگی سے کیسے بچا جائے؟

ڈینگی کے مرض سے بچاؤ کے لیے سب سے اہم چیز یہ ہے کہ کسی بھی جگہ پانی جمع نہ ہونے دیا جائے۔ عام لوگوں کی توجہ صرف گندے پانی کی جانب جاتی ہے لیکن اس مرض کو پھیلانے میں اہم ترین کردار صاف پانی ادا کرتا ہے اور مچھر دانیوں اور اسپرے کا استعمال لازمی ہے کیوں کہ ایک مرتبہ یہ مرض ہوجائے تو اس وائرس کو جسم سے ختم ہونے میں دو سے تین ہفتوں تک کا وقت لگ سکتا ہے۔

اس کے علاوہ بارش کے بعد اکثر گھروں کے آس پاس یا لان ، صحن وغیرہ میں پانی جمع ہو تو اسے فوراً نکال کر وہاں اسپرے کرنے سے ڈینگی سے بچاؤ ممکن ہے۔