وزیر اعلیٰ سندھ سید مراد علی شاہ نے کہا ہے کہ اجرک کے رنگ دنیا کو پیغام دیتی ہے کہ سندھ کے لوگ تمام مخلوق سے پیار کرتے ہیں۔

مراد علی شاہ نے ثقافت اور یکجہتی کے دن پوری دنیا میں بسنے والے سندھیوں کو مبارکباد دی، اس موقع پر ان کا کہنا تھا کہ آج کا دن ثقافتوں کی ترقی، بلا تفریق انسانیت کے احترام اور محبت کا درس دیتا ہے۔

ان کا کہنا تھا کہ سندھ صوفیوں کی دھرتی ہے یہاں کے بسنے والے دوسری ثقافتوں، دوسروں کے عقائد کو احترام سے دیکھتے ہیں، آج اجرک کے رنگ دنیا کو پیغام دیتی ہے کہ سندھ کے لوگ اس دھرتی پر بسنے والی تمام مخلوق سے پیار کرتے ہیں۔

وزیر اعلیٰ سندھ سید مراد علی شاہ نے مزید کہا کہ آج کا دن نسل پرستی،  انتہا پسندی اور ہر قسم کی تفریق کے خلاف یکجہتی کا دن ہے۔

واضح رہے کہ وادی سندھ کی صدیوں پرانی تہذیب کو فروغ دینے کے لیے آج سندھ کا ثقافتی دن روایتی جوش و جذبے کے ساتھ منایا جا رہا ہے، اس دن کو منانے کے لیے صوبے بھر میں سرکاری اور غیر سرکاری سطح پر مختلف پروگرام منعقد کیے گئے ہیں۔

عوام کی جانب سے ثقافتی دن پر مختلف مقامات سے ریلیوں کا بھی انعقاد کیا گیا ہے، لوگ سندھ ٹوپی اور اجرک پہن کر سندھ ثقافتی میوزک پر جھوم رہے ہیں اور بچوں کی موج مستیاں بھی جاری ہیں۔

 خیال رہے کہ ثقافتی تقریبات میں تقاریر، ٹیوز، اسٹیج ڈراماز اور سندھی فنکار اپنے فن کا مظاہرہ کریں گے۔