برطانیہ کی آکسفورڈ یونیورسٹی نے کہا ہے کہ مُستقبل میں آنے والے وبائی امراض کورونا سے بھی زیادہ خطرناک ہو سکتے ہیں۔

فرانس کی خبر رساں ایجنسی اے ایف پی کے مطابق کورونا وائرس کی ویکسین ایسٹرا زینیکا کی موجد اور آکسفورڈ یونیورسٹی میں ویکسینالوجی کی پروفیسر سارہ گلبرٹ نے کہا ہے کہ یہ پہلا موقع نہیں ہے کہ وائرس نے ہماری زندگیوں کو متاثر کیا ہے۔ حقیقت یہ ہے کہ اگلی وبا سے صورتحال مزید خراب ہو سکتی ہے۔ وہ زیادہ پھیل سکتی ہے یا زیادہ خطرناک ہو سکتی ہے یا یہ دونوں چیزیں ہو سکتی ہیں۔

پروفیسر سارہ گلبرٹ کے مطابق جس صورتحال سے ہم اب گزر رہے ہیں ایسا دوبارہ نہیں ہونا چاہیے۔ ہم نے جو پیش رفت کی ہے اور جو علم حاصل کیا ہے اسے رائیگاں نہیں جانا چاہیے۔

پروفیسر سارہ گلبرٹ نے کہا کہ اومیکرون ویریئنٹ تبدیل ہوتا ہے جس کی وجہ سے وائرس زیادہ پھیلتا ہے۔ کورونا وائرس کی اس قسم میں کچھ اضافی تبدیلیاں ہیں جن کا مطلب ہے کہ ویکسین سے پیدا ہونے والی اینٹی باڈیز اومیکرون سے بچانے میں کم موثر ثابت ہو سکتی ہیں۔

پروفیسر سارہ گلبرٹ نے کہا کہ جب تک ہمیں زیادہ معلومات حاصل نہیں ہوتیں ہمیں محتاط رہنا چاہیے اور کورونا کی نئی قسم کو روکنے کے لیے اقدامات کرنے چاہئیں۔

جان ہاپکنز یونیورسٹی کے مطابق دنیا بھر میں اب تک کورونا وائرس سے 5 کروڑ 26 لاکھ افراد ہلاک ہو چکے ہیں اور عالمی معیشتوں کو کھربوں ڈالرز کا نقصان پہنچا ہے۔