وفاقی پارلیمانی سیکرٹری برائے موسمیاتی تبدیلی رخسانہ نوید نے کہا ہے کہ موجودہ حکومت ملک کو منشیات سے پاک کرنے کے لیے اہم اقدامات اٹھا رہی ہے۔

گزشتہ روز یونیک گروپ آف انسٹی ٹیوشنز کے ڈاکٹر نثار احمد رانا آڈیٹوریم میں ڈرگ آگاہی سیمینار ہوا جس میں رخسانہ نوید نے خطاب کرتے ہوئے کہا کہ موجودہ حکومت ملک کو منشیات سے پاک کرنے کے لیے اہم اقدامات اٹھا رہی ہے اور اس ضمن میں تعلیمی اداروں کا تعاون خصوصی اہمیت کا حامل ہے۔

انہوں نے کہا کہ منشیات جیسی برائی سے نوجوان نسل منفی سرگرمیوں کا حصہ بنتے ہیں اور موثر تربیت سے ہی نوجوانوں کو اس سے دور رکھا جا سکتا ہے، موجودہ حکومت کے اہداف میں تعلیمی اداروں کو ڈرگ فری کرنے کے لیے ہر ممکن قدم اٹھانا ہے۔

بیگم رخسانہ نوید کا کہنا تھا کہ یونیک گروپ آف انسٹی ٹیوشنز جیسے تعلیمی ادارے میں ڈرگ آگاہی سیمینار سے طلبا کو اس برائی سے دور رکھنے میں مدد ملے گی اور اس حوالے سے یونیک گروپ کا اقدام مثبت ہے۔

اس موقع پر خطاب کرتے ہوئے چیئرمین یونیک گروپ آف انسٹی ٹیوشنز پروفیسر عبد المنان خرم نے کہا کہ مشکلات پر قابو پانے کے لیے منشیات جیسی برائی کا سہارا لینا ایک منفی اقدام ہے۔ انہوں نے کہا کہ کامیاب لوگ مشکلات کا ڈٹ کر مقابلہ کرتے ہیں اور ناکام صرف اپنی ناکامی سے بچنے اور مشکلات سے کنارہ کشی کرنے کے لیے منشیات جیسی برائی کا سہارا لیتے ہیں۔

اس موقع پر خطاب کرتے ہوئے چیف کوآرڈینیٹر نارکوٹکس کنٹرول پنجاب فواد رسول کا کہنا تھا کہ طلبا کی سماجی تربیت کے حوالے سے والدین اور اساتذہ کا کردار اہم ہے اور انہی کی مدد سے منشیات سے دور رکھا جا سکتا ہے۔

سیمینار میں خطاب کرتے ہوئے انسداد منشیات مہم کے کوآرڈینیٹر سید ذو الفقار حسین نے کہا کہ نوجوان نسل کی مثبت رہنمائی سے معاشرے کو منشیات سے پاک کرنے میں مدد ملے گی اور اس حوالے سے تعلیمی ادارے اپنا خصوصی کردار ادا کر سکتے ہیں،انہوں نے پاکستان کا دیگر ممالک کے ساتھ موازنہ بھی پیش کیا۔

تقریب میں ڈرگ آگاہی کے حوالے سے خصوصی دستاویزی فلم بھی پیش کی گئی، اس موقع پر پیٹرین یونیک گروپ پروفیسر راشد مسعود، وائس چیئرمین یونیک گروپ عفیف اشرف صدیقی، ریکٹر یونیک گروپ پروفیسر امجد علی خان ، ڈائریکٹر یونیک گروپ پروفیسر وسیم انور چوہدری، مینیجر ایڈمن زنیر چوہدری، وائس پرنسپل آر اینڈ ڈی پروفیسر ریاض الحق سمیت اساتذہ اور طلبا کی کثیر تعداد نے شرکت کی۔

واضح رہے کہ اس سے قبل وفاقی پارلیمانی سیکرٹری برائے موسمیاتی تبدیلی رخسانہ نویدنے کہا تھا کہ ملک میں کچرے اور پلاسٹک کو ری سائیکلنگ کرنے کے عمل کو فروغ دینے کے لئے قانون سازی کی جائے گی۔

لاہور میں فیکٹری کا دورہ کرتے ہوئے رخسانہ نوید کا کہنا تھا کہ کچرے کو ری سائیکلنگ کرنے سے ماحولیاتی آلودگی میں کمی آئے گی اور ری سائیکلنگ کے کاروبار میں مصروف کمپنیوں کی حوصلہ افزائی کریں گے۔