سانحہ سیالکوٹ کے واقعے پر وزیراعلیٰ پنجاب سردار عثمان بزدار کی ہدایت پرپولیس کے چھاپے جاری ہیں۔

تفصیلات کے مطابق  پنجاب پولیس کی جانب سے  سی سی ٹی وی فوٹیج اورموبائل کالز کے ڈیٹا کی مددسے مزید 8 مرکزی ملزمان کو گرفتارکرلیا گیا ہے۔

عثمان بزدار کا کہنا ہے کہ ذمے دار قانون کے تحت سخت سزا کے حقدار ہیں، ذمے داروں کو قرار واقعی سزا دلائی جائے گی۔

عثمان بزدار نے مزید کہا کہ انصاف کے تمام تقاضے پورے کریں گے۔

دوسری جانب ترجمان پنجاب پولیس کا کہنا ہے کہ گرفتارہونے والے مزید ملزمان کو آج انسدادِ دہشت گردی کی عدالت میں پیش کیا جارہا ہے۔

ترجمان پنجاب پولیس کے مطابق ان ملزمان میں پریانتھا کمارا کی نعش کی بے حرمتی کرنے والا ذاکر سلمان بھی شامل ہے جسے رات گئے گرفتار کیا گیا تھا۔

ترجمان پنجاب پولیس کا کہنا ہے کہ گرفتار ملزمان میں واقعہ کی ویڈیو بنانے، اشتعال دلانے اور تشدد کرنے والے بھی شامل ہیں۔

ترجمان پنجاب پولیس نے کہا کہ وزیراعلیٰ پنجاب سردار عثمان بزدار اور آئی جی پنجاب کیس کی تحقیقات کو مسلسل مانیٹر کر رہے ہیں۔

واضح رہے کہ 3 دسمبر کو اسپورٹس گارمنٹ کی فیکٹری کے غیر مسلم سری لنکن منیجر پریانتھا کمارا پر فیکٹری ورکرز نے مذہبی پوسٹر اتارنے کا الزام لگا کر حملہ کردیا تھا۔

 پریانتھا کمارا جان بچانے کیلئے بالائی منزل پر بھاگے لیکن فیکٹری ورکرز نے پیچھا کیا اور چھت پر گھیر لیا۔

انسانیت سوز خونی کھیل کو فیکٹری گارڈز روکنے میں ناکام رہے، فیکٹری ورکرز منیجر کو مارتے ہوئے نیچے لائے ، مار مار کر جان سے ہی مار دیا اور اسکے بعد لاش کو گھسیٹ کر فیکٹری سے باہر چوک پر لے گئے اور لعش پر ڈنڈے  اور لاتیں مار کر لعش آگ لگا دی۔