برسبین: ایشز سیریز کے پہلے ٹیسٹ میچ میں آسٹریلیا نے انگلینڈ کے خلاف رنز کا پہاڑ کھڑا کردیا ہے۔

برسبین کے گابا اسٹیڈیم میں جاری ایشز سیریز کے پہلے ٹیسٹ میچ میں آسٹریلیا کی پوزیشن مستحکم ہوگئی ہے جبکہ آسٹریلیا نے انگلینڈ کے 147 رنز کے جواب میں رنز کا پہاڑ کردیا ہے۔

دوسرے دن کے کھیل کے اختتام تک آسٹریلیا نے 7 وکٹوں کے نقصان پر 343 رنز اسکور کرلیے ہیں جس کے بعد آسٹریلیا کو مہمان ٹیم کے خلاف 196 رنز کی برتری حاصل ہوگئی ہے۔

آج کے دن کے کھیل کے آغاز میں آسٹریلوی اوپنر مارکس ہیرس 3 رنز بناکر آؤٹ ہوگئے جس کے دوسری وکٹ پر ڈیوڈ وارنر اور مانس لبوشین نے 156 رنز کی شراکت قائم کی جس کے بعد لبوشین 74 اور وارنر 94 رنز بناکر آؤٹ ہوگئے۔

علاوہ ازیں آسٹریلوی بیٹر اسٹیو اسمتھ 12، کمیرون گرین زیرو، ایلکس کیری 12 اور پیٹ کمنس 12 بناکر پویلین لوٹ گئے ہیں جبکہ ٹریوس ہپیڈ شاندار سنچری کے ساتھ 112 رنز بناکر کریز پر موجود ہیں۔

واضح رہے کہ انگلینڈ اور آسٹریلیا کے درمیان 5 میچز پر مشتمل ایشز سیریز کھیلی جارہی ہے، یہ تمام میچز آئی سی سی ٹیسٹ چیمپئن شپ کا حصہ ہیں۔

یاد رہے کہ گزشتہ سال برطانیہ میں کھیلی گئی ایشز سیریز 2،2 سے برابر ہوگئی تھی۔