امریکی ایوان کانگریس میں  ایران کے فوجی ڈرونز پر پابندی کا بل منظور کرلیا گیا ۔

امریکی قانون سازوں نے آسٹریا ئی دارالحکومت ویانا میں تہران پر عائد پابندیوں کے خاتمے کے لیے ہونے والے مذاکرات کے درمیان  میں ایران کے خلاف ایک اور جارحانہ اقدام کرتے ہوئےان کے فوجی ڈرونز کے پھیلاؤ کو محدود کرنے کے بل کی منظوری دے دی ہے۔

ہاؤس فارن افیئرز کمیٹی کے سربراہ گریگوری ڈبلیو میکس نے ’اسٹاپ ایرانی ڈرونز ایکٹ ‘(سیڈا) کی منظوری کا اعلان کیا جس میں امریکی قانون کے تحت فوجی ایران کے ڈرونز کی سپلائی، فروخت یا منتقلی پر پابندی عائد ہو گی۔

یہ بل امریکی ایوان نمائندگان میں ریپبلکن اور ڈیموکریٹک قانون سازوں کے ایک گروپ کی طرف سے تجویز کیا گیا تھا  جس میں ایرانی ڈرونز پروگرام کے بڑھتے ہوئے خطرے کا دعویٰ کیا گیا تھا۔

اپنے  بیان میں گریگوری ڈبلیو میکس نے ایران پر  مشرق وسطیٰ میں ڈرون حملےکرنے کا الزام لگاتے ہوئے کہا کہ امریکی کانگریس اس طرح کی کسی بھی سرگرمی کو برداشت نہیں کرے گی اور بائیڈن انتظامیہ کی جانب سے اس  طرح کی سرگرمیوں پر نظر رکھی جا رہی ہے۔

ان کا مزید کہنا تھا کہ  یہ قانون سازی ایران کے جارحانہ حربوں سے امریکہ اور اس کے شراکت داروں کو لاحق خطرے  میں کمی کا سبب بنے گی۔

دوسری جانب ایرانی حکام کا دعویٰ ہے کہ ایران کی فوجی ڈرون صلاحیتیں امریکہ اور اس کے علاقائی اتحادیوں کی جارحانہ چالوں کے مقابلے میں خالصتاً دفاعی ثابت ہوئی ہیں، جو مغربی ایشیا اور دیگر جگہوں پر افراتفری اور کشیدگی کو ہوا دے رہے ہیں۔

واضح رہے کہ  ایرانی فوجی اور تکنیکی ماہرین نے حالیہ برسوں میں وسیع پیمانے پر فوجی سازوسامان کی تیاری میں بڑی پیش رفت کی ہے اور اپنی مسلح افواج کو اس سلسلے میں خود کفیل بنایا ہے۔