مریم اورنگزیب کا کہنا ہےکہ نیب نیازی گٹھ جوڑ ایک دھیلے کی کرپشن ثابت نہیں کرسکے۔ 

ترجمان مسلم لیگ ن مریم اورنگزیب نے پریس کانفرنس کرتے ہوئے کہاکہ شہزاد اکبر صاحب بڑے بڑے دعوے کیا کرتے تھے ، ایک دھیلے کی کرپشن ثابت نہیں کرسکے، عمران خان صاحب اب اس تماشے کو بند ہونا چاہیے۔

انہوں نے کہاکہ نیب کے بعد ایف آئی اے کو استعمال کیا گیا، عمران خان 3 سال سے عوام سے بدلہ لے رہے ہیں، شہبازشریف نے جو منصوبہ لگایا اس پر انکوائری کھولی گئی جس منصوبے سے عوام کا فائدہ ہوا اس پر کیس کھولا گیا۔

مسلم لیگ ن کی ترجمان نے کہاکہ ڈیلی میل آج بھی ہاتھ جوڑ کرشہبا ز شریف سے معافیاں مانگ رہا ہے ،ڈیلی میل کے ذرایعے شہباز شریف کے خلاف اسٹوری پلانٹ کروائی گئی، آج عوام کی جیبوں پر ڈاکہ ڈالا جارہا ہے،2018 میں نالائقوں اور اے ٹی ایمز کی حکومت بنی۔

مسلم لیگی رہنما کا کہنا ہےکہ حمزہ شہباز کو جیل میں ڈالا گیا، بشیر میمن صاحب کو کہا گیا مسلم لیگ ن کے لوگوں پر کیسز بناؤ، بشیر میمن صاحب نے کہا ان پر ایف آئی اے کے کیسز نہیں بنتے۔

مریم اورنگزیب نے کہاکہ انہیں پاکستانی عوام کی کوئی فکر نہیں، آج ڈالر 180 روپے کا پہنچ گیا،عوام گیس، بجلی کے بل نہیں دے پارہی، یہ نالائق حکومت خود آٹا اور چینی چور مافیا ہے، شہباز شریف آپ کی نالائقیاں اور چوریاں سامنے لاتے رہینگے۔

ان کا کہنا تھا کہ سوا سال گزر گیا بینکنگ کورٹ میں ایف آئی اے جواب نہیں جمع کروا سکی، جج صاحب کو کہا گیا ہمارے پاس صرف فوٹو کاپی ہے،جج صاحب نے ایف آئی اے ڈائریکٹر کو شوکاز جاری کیا۔

مسلم لیگ ن کی ترجمان مریم اورنگزیب نے مزید کہاکہ کسی کمیشن کی رپورٹ نہیں آتی اپنے تمام کیسز بنی گالہ میں دفن کردو،عمران خان خود چوری میں ملوث ہو تو مانٹرینگ کیسے ہو گی، بجلی گیس آٹے چینی والا مافیا عمران خان کی سربراہی میں لوٹ مار کررہا ہے،مانٹرینگ صرف نواز شریف اور شہباز شریف کی ہوگی۔