چیف سیکرٹری پنجاب کامران علی افضل نے کہا ہے کہ پنجاب حکومت کاشتکاروں کے مفاد کا تحفظ کرے گی۔

کامران علی افضل سے پاکستان کسان اتحاد کے 5 رکنی وفد نے ملاقات کی، وفد نے مرکزی صدر خالد محمود کھوکھر کی سربراہی میں چیف سیکرٹری کو کاشتکاروں کے مسائل بارے آگاہ کیا۔

ملاقات میں گندم کی امدادی قیمت، ٹیوب ویلز کیلئے بجلی کے ٹیرف اور زراعت کی بہتری کیلئے اقدامات پر تبادلہ خیال ہوا۔

چیف سیکرٹری پنجاب کامران علی افضل کا کہنا تھا کہ زرعی شعبے کی بہتری، کسانوں کے مسائل کے حل کیلئے ہر ممکن اقدامات کئے جائیں گے، گندم کی فصل کیلئے یوریا کھاد کی مقررہ قیمت پر دستیابی کو یقینی بنایا جائے گا۔

کامران علی افضل کا کہنا تھا کہ پنجاب حکومت کاشتکاروں کے مفاد کا تحفظ کرے گی، جن معاملات کا تعلق وفاق سے ہے انہیں حل کرنے کیلئے وفاقی حکومت سے بات کی جائے گی۔

وفد نے کسانوں کے مسائل کے حل کیلئے حکومتی کوششوں کو خوش آئند قرار دیا، وفد نے گفتگو کرتے ہوئے کہا کہ فصلوں کی پیداواری لاگت میں کئی گنا اضافہ ہوا ہے۔

اس موقع پر خالد کھوکھر کا کہنا تھا کہ گندم کی امدادی قیمت میں اضافہ، ٹیوب ویلز کیلئے بجلی سستی کی جائے، زراعت کا شعبہ ملکی معیشت میں ریڑھ کی ہڈی کی حیثیت رکھتا ہے، کسان خوشحال ہو گا تو ملک ترقی کرے گا۔

وفد نے زراعت کے شعبے کی بہتری کیلئے زرعی ماہرین پر مشتمل تھنک ٹینک قائم کرنے کی تجویز کی۔

واضح رہے کہ وفد میں چوہدری حسان اکرم، آفاق احمد ٹوانہ، رابعہ سلطان اور سردار سعید ڈوگر شامل تھے۔