وفاقی وزیر توانائی حماد اظہر نے کہا کہ 10، 15 سال سے سردیوں میں گیس کی قلت کا سامنا کرنا پڑتا ہے۔

وزیر توانائی حماد اظہر نے تقریب سے خطاب کرتے ہوئے کہا کہ 10، 15  سالوں سے سردیوں میں گیس کی قلت کا سامنا کرنا پڑتا ہے، موجودہ حکومت کے دورمیں ایل این جی خریدنے یا نہ خریدنے کا ایک بیانیہ بن گیا ہے، کہا جاتا ہے کہ حکومت کے ایل این جی نہ خریدنے سے گیس کی قلت پیدا ہوتی ہے۔

انہوں نے کہا کہ گیس کی قلت کا ایل این جی سے کوئی تعلق نہیں ہے، اگر درآمدی گیس صارفین کو دینا شروع کردیں تو گیس کمپنیاں دیوالیہ ہو جائیں گی، ماضی میں اس مسئلے کو صحیح طریقے سے بیان نہیں کیا۔

وزیر توانائی نے کہا کہ ہمارے ہاں ہر سال گیس کی 9 فیصد کمی ہورہی ہے، لوکل گیس کا فلو 2 ہزار سے کم ہوکر 800 ایم ایم سی ایف ڈی رہ گیا ہے۔

حماد اظہر نے کہا کہ گیس کے مسئلے پر قانون سازی کرنے جارہے ہیں، مقامی اور درآمدی گیس کی اوسط قیمت کے تعین کے لئے قانون سازی کرنے جارہے ہیں۔

ان کا کہنا تھا کہ منفرد طرز کے ورچوئل ایل این جی ٹرمینلز لگانے جارہے ہیں،  یہ ٹرمینلز ہماری گیس پائپ لائنز کے ذریعے اپنے صارفین کو گیس فراہم کرسکیں گے۔

وزیر توانائی نے کہا کہ 1950 کے بعد سے ملک میں گیس کا بہت بڑا زخیرہ دریافت نہیں ہوا ہے۔

انہوں نے کہا کہ حکومت ٹائٹ گیس پالیسی لارہی ہے، بعض عالمی کمپنیاں ٹائٹ گیس میں سرمایہ کاری کرنا چاہتی ہیں، دور دراز علاقوں میں ہمیں اسمارٹ گرڈز پر جانا ہے۔