یمن  کے دارالحکومت صنعا میں عرب اتحاد کی افواج نے بیلسٹ میزائلوں اور ڈرون تنصیبات کے ذخیرے کے لئے استعمال ہونے والے دو غاروں کو تباہ کر دیا۔

عرب میڈیا کے مطابق عرب اتحادی افواج کے جنگی طیاروں نے گولہ بارود کے لئے استعمال ہونے والے دو غاروں کو نشانہ بنا کر تباہ کر دیا۔ اتحادی افواج کے ترجمان نے آج صبح ائیر اسٹرائک کی تفصیلات سے آگاہ کیا۔

عرب اتحاد کی افواج کے مطابق اتحادی جنگی طیاروں نے بیلسٹک میزائلوں کے ذخیرے کے لئے استعمال کئے جانے والے غار کو نشانہ بنایا ، اس کے علاوہ ڈرون سہولیات کے چار خفیہ مقامات کو بھی بنایا گیا۔

عرب میڈیا کے مطابق یہ ائیر اسٹرائک حوثی باغیوں کی جانب سے سعودی عرب کے شہر خمیس مشیت پر بیلسٹک میزائل حملے کے بعد کی گئی، اس بیلسٹک میزائل حملے کو سعودی افواج نے ناکام بنا دیا تھا۔

عرب اتحادی افواج کے بیان کے مطابق حوثی باغیوں کی طاقت کو کمزور کرنے کے لئے حملے جاری رہیں گے ، اور حوثی باغیوں کی شر انگیزیوں کا منہ توڑ جواب دیا جائے گا۔

بحرین اورکویت نے بھی حوثی باغیوں کی جانب سے سعودی عرب پر بیلسٹک میزائل کے حملے پر سخت تنقید کی ہے اور کہا ہے کہ شہری علاقوں اور عمارتوں کو نشانہ بنانے والے اسی سلوک کے مستحق تھے۔

بحرین اور کویتی حکومت نے اپنے علیحدہ علیحدہ بیان میں حوثی باغیوں کے شہری علاقوں پر حملے کو بین الاقوامی انسانی حقوق کی سنگین اور سخت خلاف ورزی قرار دیا ہے۔

عرب اتحاد کی افواج نے حوثی باغیوں کے بیلسٹک میزائل حملے کے بعد سرحد پار جوابی کاروائیوں کو مزید تیز کرنے کا اعلان کیا ہے۔

واضح رہے کہ حوثی باغیوں نے 2014 میں یمن کے دارالحکومت پر قبضہ کر لیا تھا، جبکہ سعودی حکومت بین الاقوامی سطح پر تسلیم شدہ حکومت کو ہی سپورٹ کرتی آئی ہے۔