سعودی عرب نے افغانستان کے لیے انسانی ہمدردی کی بنیاد پر امدادی سامان سے بھرے دو طیارے روانہ کردیے۔

سعودی سرکاری میڈیا کے مطابق آج افغانستان کے لیے امدادی سامان سے بھرے دو طیارے روانہ ہوئے ہیں۔ شاہ سلمان انسانی امداد اور ریلیف سینٹر کی جانب سے 65 ٹن کا امدادی سامان بھیجا گیا ہے جس میں 1647 غذائی اشیا کی ٹوکریاں شامل ہیں۔ کابل پر طالبان حکومت کے بعد سعودی حکومت کی طرف سے بھیجی گئی یہ پہلی امداد ہے۔

سعودی امدادی ادارے کے سربراہ عبداللہ الربیع نے بتایا کہ سعودی عرب کے فضائی امدادی پروگرام  کے تحت کل 6 طیاروں کے ذریعے افغانستان کو 197 ٹن امدادی سامان فراہم کیا جائے گا۔ یہ امدادی سامان 200 ٹرکوں کے ذریعے پاکستان سے افغانستان پہنچایا جائے گا۔

خلیجی عرب ممالک نے رواں ہفتے منگل کے روز ریاض میں منعقدہ گلف کوآپریشن کونسل کے سربراہی اجلاس کے دوران افغان عوام کو انسانی امداد فراہم کرنے اور ان کے معاشی حالات کو بہتر بنانے کے لیے بین الاقوامی کوششوں کو متحرک کرنے پر اتفاق کیا تھا۔

اقوام متحدہ کے مطابق افغانستان کی 38 ملین آبادی میں سے نصف سے زائد کو خوراک کی شدید کمی کا سامنا ہے۔ موسم سرما کے دوران لاکھوں افراد نقل مکانی یا پھر فاقہ کشی میں سے کسی ایک کا انتخاب کرنے پر مجبور ہیں۔

افغانستان میں رواں برس اگست میں امریکی اور مغرب نواز حکومت کے انہدام کے بعد اقتدار میں واپس آنے والے طالبان اعتدال پسند رویہ اختیار کرنے کی کوشش کر رہے ہیں تاکہ عالمی سطح پر ان کی حکومت کو تسلیم کرکے معاشی پابندیاں ختم کی جائیں۔