مسلم لیگ کے رہنما لک احمد خان کا کہنا ہے کہ شہزاد اکبر ایک ایسا وائرس ہیں جو جھوٹ کی بنیاد پروجود رکھتے ہیں، وہ ملکی سیاست کے اومیکرون ہیں۔

لاہور میں مسلم لیگ ن کے رہنماؤں ملک احمد خان اورعطا تارڑ نے مشیر وزیراعظم شہزاد اکبر کے جواب میں پریس کانفرنس کی۔

ملک احمد نے کہا کہ شہزاد اکبرجھوٹ بریگیڈ کے سرغنہ ہیں جو حکومت کے تحت کام کررہا ہے۔ شہزاد اکبر نے صحیح سے وہ ڈاکیومنٹ بھی نہیں پڑھے جو ایف آئی اے میں جمع کروائے ہیں۔ شہزاد اکبرنے جو کچھ بھی کیا غیر قانونی کیا۔ آج تک نہیں دیکھا کہ بہ طور وزیر تفتیش کو کنٹرول کیا جارہا ہو۔ یہاں پر الٹی گنگا بہائی گئی، شہزاد اکبر کو اختیار دیا گیا کہ وہ اپنی مرضی کے نتائج تفتیش سے حاصل کریں۔

لیگی رہنما کا کہنا ہے کہ شریف گروپ آف انڈسٹری کو شہزاد اکبر کے خلاف قانونی چارہ جوئی کرنی چاہئے۔ شہزاد اکبر آنکھیں رکھنے کے باوجود اگراندھے ہیں تو اچنبھے کی بات نہیں۔ شہزاد اکبر جیسے لوگ ڈھٹائی اور بے شرمی سے جھوٹ بولتے ہیں۔ ہم قانونی چارہ جوئی کرتے ہوئے انہیں بھاگنے نہیں دیں گے۔ ہم نے الزامات کو سنا بھی ہے، سہا بھی ہے اور جواب بھی دیا ہے۔ شہزاد اکبر کی ساری باتیں بد نیتی پر مبنی ہیں۔ شہزاد اکبر نے تین سال تک جھوٹ، غلط مقدمات قائم کرنے کے باوجود نیب، ایف آئی اے سمیت دیارِغیر سے بھی خاک چاٹی۔

رہنما مسلم لیگ ن عطا تارڑ نے کہا کہ شہزاد اکبر نے جتنے کیسس بنائے وہ سب جھوٹ کا پلندہ ہیں۔ ایک بھی کیس میں ایک دھیلے کی کرپشن ثابت نہیں ہوئی ہے۔ شہزاد اکبرکو کئی دفعہ ڈانٹ پڑ چکی ہے، ان کی کئی بار سرزنش بھی ہوئی ہے۔

انھوں نے کہا کہ شہزاد اکبر کو پتا ہے کہ عمران نیازی کے دن گنے جاچکے ہیں۔ عمران نیازی کو انتقام میں جلانے والا شخص شہزاد اکبر ہے۔ ایف آئی اے میں ڈیڑھ سال بعد چالان جمع کروانا شرمناک اور افسوسناک ہے۔ شہزاد اکبر سے جھوٹا شخص کرہ عرض پہ کوئی نہیں ہے۔ شہزاد اکبر اپنی نوکری بچانے کے لیے جھوٹ بولتے ہیں۔ ہم شہزاد اکبر کو بھاگنے نہیں دیں گے۔

کوئی بھی پی ٹی آئی کا ٹکٹ لینے کو تیار نہیں ہے

عطا تارڑ کا کہنا ہے مسلم لیگ ن نے ضمنی الیکشنز میں کامیابی کا سلسلہ جاری رکھا ہوا ہے۔ اس وقت ملک میں ووٹ چوروں کی حکومت ہے۔ پی ٹی آئی لاہور کے الیکشن میں سوچے سمجھے منصوبے کے تحت میدان چھوڑ کر بھاگ گئی۔ خانیوال میں پی ٹی آئی کو 14 ہزار کے مارجن سے شکست دی۔

انھوں نے مذید کہا کہ پی ٹی آئی کے امیدوار نے بینر پہ عمران خان کی تصویر نہیں لگائی۔ پی ٹی آئی کا ٹکٹ آنے والے انتخابات میں بہت بھاری ہوچکا ہے۔ کوئی بھی پی ٹی آئی کا ٹکٹ لینے کو تیار نہیں ہے۔ خانیوال لودھراں کی 90 کلومیٹر کی موٹروے شہبازشریف نے چھ ماہ میں بنوائی۔ اب لوگ کہتے ہیں کہ ہمیں پرانا پاکستان واپس کریں۔  کل ووٹ کو بھی عزت ملی اور خدمت کو ووٹ ملا۔ عام انتخابات میں بھی یہی ٹرینڈ ہوگا جو کل خانیوال میں دیکھا گیا۔