نیب پراسیکیوٹرز کی مدت ملازمت میں توسیع یومیہ کارکردگی رپورٹ سے مشروط کردی گئی ہے۔

بول نیوز کے مطابق نیب ترمیمی آرڈیننس کے بعد پراسیکیوشن ونگ کا کام کرنے کے طریقہ کار سے متعلق پراسیکیوٹر جنرل نیب نے تمام ڈپٹی پراسیکیوٹرز کو خصوصی مراسلے جاری کردیئے ہیں۔

مراسلے میں کہا گیا ہے کہ نیب کے بیوروز کو کام سے روکنے کا تاثر مکمل طور پر غلط ہے، نیب کی استغاثہ ٹیم کسی کیس میں کوئی التوا نہیں مانگے گی، نیب کے وکیل تمام عدالتوں میں اپنے جواب جتنا جلدی ممکن ہو سکے جمع کرائیں گے۔

متعلقہ خبر: نیب کا کسی فرد، جماعت یا کسی تنظیم سے کوئی تعلق نہیں، جاوید اقبال

پراسیکیوٹر جنرل نیب نے اپنے خط میں ہدایت کی ہے کہ نیب پراسیکیوٹرز عدالتی نوٹس پر تین دن کے اندر تحریری جواب تیار کر کے منظوری کے لئے ہیڈکوارٹرز میں بھیجیں۔

دوسری جانب پراسیکیوٹر جنرل نیب نے تمام بیوروز کے ڈپٹی پراسیکیوٹر کو روزانہ کی بنیاد پر کارکردگی کا پرفارما تیار کرنے کی بھی ہدایت جاری کردی ہے۔ ڈپٹی پراسیکیوٹرز کو کہا گیا ہے کہ ڈپٹی پراسیکیوٹرز اپنے اپنے بیورو کی ہفتہ وار تفصیلی پیشرفت رپورٹ بھی ہر جمعہ کو بھیجیں، مستقبل میں پراسیکیوٹرز کو کنٹریکٹ میں توسیع یومیہ کارکردگی رپورٹ کی بنیاد پر ہی ملے گی۔

متعلقہ خبر: سینیٹ میں نیب ترمیمی بل منظور

واضح رہے کہ چند ہفتوں قبل حکومت نے نیب آرڈیننس میں ترمیم کی ہے ، جس کے بعد عدالتوں میں زیر سماعت مقدمات کے حوالے سے کئی قانونی ابہام پیدا ہوگئے تھے۔