وزیر خارجہ مخدوم شاہ محمود قریشی نے کہا ہے کہ مہمان وزرائے خارجہ کی سہولت کیلئے ہر ممکن انتظامات کو یقینی بنایا گیا ہے۔

شاہ محمود قریشی نے وزارتِ خارجہ کے سینئر حکام کے ہمراہ پارلیمنٹ ہاؤس کا دورہ کیا، اس موقع پر اسپیشل سیکرٹری خارجہ رضا بشیر تارڑ، ترجمان وزارت خارجہ عاصم افتخار و دیگر سینئر افسران وزیر خارجہ کے ہمراہ تھے۔

وزارت خارجہ کے سینئر حکام نے وزیر خارجہ کو پارلیمنٹ میں او آئی سی وزرائے خارجہ کونسل کے غیر معمولی اجلاس کے حوالے سے کیے گئے انتظامات سے متعلق تفصیلی بریفنگ دی۔

وزیر خارجہ نے کانفرنس ہال، وفود کی سہولت کیلئے بنائے گئے کاؤنٹرز، میڈیکل سینٹر، میڈیا سینٹر اور مختلف میٹنگ رومز ملاحظہ کیے اور انتظامات پر اطمینان کا اظہار کیا۔

مخدوم شاہ محمود قریشی کا کہنا تھا کہ او آئی سی وزرائے خارجہ کونسل کے غیر معمولی اجلاس کی میزبانی کو بہت بڑا اعزاز سمجھتے ہیں، وزیر اعظم عمران خان کی خصوصی ہدایت پر مہمان وزرائے خارجہ و دیگر وفود کی سہولت کیلئے ہر ممکن انتظامات کو یقینی بنایا گیا ہے۔

انہوں نے کہا کہ آج پارلیمنٹ میں اعلیٰ حکام کی بیٹھک ہو گی جس میں کل کے ایجنڈے کو حتمی شکل دی جائے گی۔

وزیر خارجہ مخدوم شاہ محمود قریشی کا مزید کہنا تھا کہ امید ہے کہ افغانستان کی انسانی صورتحال کے تناظر میں منعقد ہونے والے اس غیر معمولی وزرائے خارجہ اجلاس کے مثبت نتائج سامنے آئیں گے۔

دفتر خارجہ کے مطابق او آئی سی وزرائے خارجہ کونسل کا اہم اجلاس کل 19 دسمبر کو اسلام آباد میں ہوگا۔

اجلاس میں او آئی سی کے وزرائے خارجہ کے علاوہ اقوام متحدہ، یورپی یونین اور بین الاقوامی مالیاتی اداروں کے نمائندوں سمیت امریکا، چین، روس، جرمنی، اٹلی، جاپان اور فرانس کے خصوصی مندوبین کو بھی دعوت دی گئی ہے جبکہ افغانستان کی عبوری حکومت کا نمائندہ وفد بھی کانفرنس میں شرکت کرے گا۔

او آئی سی وزرائے خارجہ کونسل کے اس اہم اجلاس میں امریکا نے شرکت کی یقین دہانی کرائی ہے۔

امریکا کے نماٰندہ خصوصی ٹام ویسٹ اس اجلاس میں شرکت کریں گے۔