وزیر اعظم کے معاون خصوصی برائے مذہبی ہم آہنگی علامہ طاہر محمود اشرفی نے کہا ہے کہ عربی زبان سیکھنے سے عرب اسلامی ممالک میں مشکل آسان ہو جائے گی۔

 وزیر اعظم کے مشیر علامہ طاہر اشرفی نے میڈیا سے گفتگو کرتے ہوئے کہا کہ پوری دنیا میں یومِ عربی منایا جارہا ہے پورے ملک میں عربی زبان کو آسان بنانے کے لیے کام کریں گے۔

ان کا کہنا تھا کہ عربی زبان سیکھنے سے عرب اسلامی ممالک میں مشکل آسان ہو جائے گی، پاکستان میں اسکولوں اور کالجوں اور مدارس میں عربی کا شارٹ کورس کروائیں گے۔

انہوں نے کہا کہ پاکستان کے خلاف پروپیگنڈہ کیا جاتا ہے کہ خطرناک ملک ہے لیکن او آئی سی کے اجلاس سے ثابت ہو گیا ہے کہ پاکستان ایک پر امن ملک ہے، وزیر اعظم عمران خان او آئی سی کے اجلاس سے خطاب کریں گے۔

علامہ طاہر محمود اشرفی کا کہنا تھا کہ سعودی عرب کی مشاورت سے او آئی سی کا اجلاس بلایا گیا ہے، افغانستان کی صورتحال پر اجلاس بلایا گیا ہے، افغانستان حالت جنگ میں ہے اگر وہاں کی صورتحال خراب ہوتی ہے اثر پوری دنیا پر پڑے گا، کل شام کو اسلام آباد سے پوری دنیا کو افغانستان میں امن لانے کا پیغام جائے گا۔

وزیر اعظم کے معاون خصوصی برائے مذہبی ہم آہنگی علامہ طاہر محمود اشرفی نے مزید کہا ہے کہ پاکستان کی کوششوں سے دنیا کے ممالک نے افغانستان حکومت سے بات کی ہے۔

 اس سے قبل وزیرِ اعظم عمران خان سے نمائندہ خصوصی برائے مشرقِ وسطی و بین المذاہب ہم آہنگی مولانا حافظ محمد طاہر اشرفی کی ملاقات ہوئی جس میں بین المذاہب ہم آہنگی کیلئے حکومت کے اقدامات اور مشرقِ وسطی کے امور پر گفتگو ہوئی۔