شاہ محمود قریشی نے کہا ہے کہ پاکستان علاقائی تعاون اور روابط کے فروغ کیلئے سارک کے متحرک اور فعال کردار کا متقاضی ہے۔

وزیر خارجہ مخدوم شاہ محمود قریشی کی جنوب ایشیائی ممالک کی علاقائی تعاون کی تنظیم سارک کے سیکرٹری جنرل ایسالا رووان ویراکون سے وزارتِ خارجہ میں ملاقات ہوئی۔

اس موقع پر وزیر خارجہ نے سیکرٹری جنرل سارک کے ساتھ سیالکوٹ میں سری لنکن شہری کے ساتھ پیش آنے والے افسوسناک واقعہ پر گہرے دکھ اور افسوس کا اظہار کیا ۔

ان کا کہنا تھا کہ ہم نے اس افسوسناک واقعہ کے رونما ہونے کے بعد سری لنکن حکومت اور عوام کے ساتھ دلی اظہار تعزیت کیا، ہماری تمام اعلی سیاسی قیادت، مذہبی سکالرز اور پاکستانی قوم نے اس واقعہ کی مذمت کی۔

شاہ محمود قریشی نے کہا کہ وزیر خارجہ نے سیکرٹری جنرل سارک کو یقین دلایا کہ حکومت پاکستان اس بہیمانہ واقعہ کے ذمہ داران کو کیفرکردار تک پہنچائے گی۔

وزیر خارجہ نے یہ بھی کہا کہ پاکستان سارک کے بانی رکن ہونے کے ناطے، علاقائی تعاون اور روابط کے فروغ کیلئے سارک کے متحرک اور فعال کردار کا متقاضی ہے۔

انہوں نے کہا کہ سارک ممبر ممالک کے درمیان تجارتی روابط کے فروغ کے وسیع مواقع موجود ہیں جن سے فائدہ اٹھانے کی ضرورت ہے جبکہ سارک پلیٹ فارم سے وبائی صورتحال، موسمیاتی تبدیلیوں، غذائی تحفظ جیسے مشترکہ چیلنجز سے نمٹنے کیلئے بھی جامع اور مؤثر حکمت عملی اپنانے کی ضرورت ہے۔

شاہ محمود قریشی نے کہا کہ وزیر خارجہ نے سارک تنظیم کے مقاصد کی تکمیل کیلئے پاکستان کی مکمل حمایت کا یقین دلایا۔

وزیر خارجہ مخدوم شاہ محمود قریشی نے مزید کہا کہ پاکستان جغرافیائی اقتصادی ترجیحات پر توجہ مرکوز کیے ہوئے ہے۔ پاکستان، سارک کے ممبر ممالک کے درمیان زمینی، ہوائی، اور آبی روابط کو بڑھانے کی حمایت کرتا ہے۔