وزیراعظم کی معاون خصوصی برائے اطلاعات فردوس عاشق اعوان نےجے یوآئی (ف) کےسربراہ مولانافضل الرحمان کو کڑی تنقید کانشانہ بناتے ہوئے کہاہے کہ مولانا صاحب آپ جس طرح خالی ہاتھ اسلام آباد آئےتھے، ویسے ہی خالی ہاتھ واپس لوٹ گئے۔

تفصیلات کےمطابق معاون خصوصی برائےاطلاعات ونشریات نےٹویٹ کرتے ہوئے کہاکہ آپ کی سیاسی جڑیں عوام نے کاٹیں لیکن آپ جمہوریت سے بدلہ لینے پر تل گئے،قوم نے دیکھ لیا کہ کون اسلام آباد سے چلتا بنا اور ہل کر باہر جا گرا۔

معاون خصوصی نے کہاکہ عوام نے آپ کو مسترد کرکے ثابت کیا کہ وہ انتہا پسندی کے ساتھ نہیں،عوام نے آپ کے سارے پلان چوپٹ کر دئیے اور آپ کو پلان “ایگزٹ” کا سہارا لینا پڑا۔ “روڈز بلاک”پلان بھی عوام نے مسترد کردیا۔

فردوس عاشق اعوان کاکہناتھاکہ مولانا جمہوریت کے راستے میں انا کی رکاوٹیں کھڑی کرکے اپنا سیاسی مستقبل خراب نہ کریں،حلقے میں جائیں، سیاسی طور پرہلکے نہ ہوں۔

انہوں نےکہاکہ مولانالشکرکشی اورغیرجمہوری ہتھکنڈوں میں ناکامی کے بعد اپنی خفت مٹانے کی کوشش کررہے ہیں. ہم نے تحمل اوربردباری کا مظاہرہ کرتے ہوئے جمہوری طرزعمل اختیار کیا۔

معاون خصوصی نےمزید کہاکہ آپ کےاحتجاج کے حق کو تسلیم کیا۔ عمران خان کے دھرنے کے خلاف آپ کی نفرت انگیزی اوردھمکیاں تاریخ کا حصہ ہیں۔

انہوں نےمزیدتنقید کرتے ہوئے کہاکہ یہ وہی پارلیمان ہے جس میں آپ کے فرزند آپ کی کرسی پر بیٹھے ہیں، ان کی تنخواہ اور مراعات حلال اورجائز ہیں؟