ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے کہا ہے کہ پاکستان اور عوام کا ہر منصوبہ نااہلوں پر بجلی بن کر گرتا ہے۔

ڈاکٹر شہباز گِل نے مریم اورنگزیب کے بیان پر ردِ عمل دیتے ہوئے کہا کہ ماضی میں ہر منصوبہ شریف خاندان کی سہولت دیکھ کر ترتیب دیا گیا، کک بیکس کیلئے تختیاں لگانے والوں کا صفایا ہوچکا۔

ان کا کہنا تھا کہ سفاری سوٹ اور لمبے بوٹ پہن کر فوٹو شوٹ کرنے والے شعبدہ بازوں کی چھٹی ہو چکی، آج حقیقی معنوں میں عوام کی فلاح کے منصوبوں پر کام ہو رہا ہے۔

انہوں نے کہا کہ وزیر اعلیٰ بن کر کرپٹِ اعلیٰ بننے والے اپنی کرپشن اور منی لانڈرنگ کا حساب دیں، کرپشن کی نظر ہونے والا پیسہ آج ‏صحت، زراعت، تعلیم اور انڈسٹری پر خرچ ہو رہا ہے۔

ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل کا مزید کہنا تھا کہ پاکستان اور عوام کا ہر منصوبہ نااہلوں پر بجلی بن کر گرتا ہے، اسپیشل ٹیکنالوجی زون پاکستان کیلئے آئی ٹی انقلاب کی راہ ہموار کرے گا۔

واضح رہے کہ پاکستان مسلم لیگ (ن) کی ترجمان مریم اورنگزیب کا کہنا تھا کہ  عمران خان آج ایک بار پھر اس منصوبے کا سنگ بنیاد رکھیں گے جس کا  افتتاح 2014 میں ہوچکا ہے۔

ان کا کہنا تھا کہ وزیر اعظم عمران خان کا لاہور میں نالج پارک کے افتتاح پر بیان دیتے ہوئے کہا ہے کہ عمران صاحب نالج پارک کا افتتاح 2014 میں شہباز شریف صاحب کر چکے ہیں۔

مریم اورنگزیب نے کہا کہ عمران صاحب شہباز شریف کے منصوبوں کے دوبارہ افتتاح چھوڑیں اور گھر جانے کی منصوبہ بندی کریں۔

پاکستان مسلم لیگ (ن) کی ترجمان نے کہا کہ عمران صاحب عوام کو آپ کی جھوٹی تختیاں نہیں بلکہ رخصتی چاہئیے۔

ان کا کہنا تھا کہ نالج پارک کے لیے زمین کا حصول، منصوبہ بندی اور تمام کام وزیراعلی پنجاب شہباز شریف 2014 میں مکمل کر چکے ہیں۔

مریم اورنگزیب نے کہا کہ عمران صاحب نے شہباز شریف کی بنائی ہوئی تمام لائبریریاں بھی بند کر دیں جبکہ عمران صاحب نے لائبریریوں کے منصوبے کی نیب تحقیقات شروع کرائی اور فنڈز بند کرادیے۔

مریم اورنگزیب کا کہنا تھا کہ عمران صاحب صرف نواز شریف اور شہباز شریف کے منصوبوں کا نام تبدیل کرکے تختیاں لگانے کی صلاحیت رکھتے ہیں۔

پاکستان مسلم لیگ (ن) کی ترجمان نے کہا کہ عمران صاحب آپ کی رخصتی اور گھر روانگی کے عوامی منصوبے کا افتتاح ہوچکا ہے۔

انہوں نے مزید کہا کہ اب صرف عمران صاحب کے گھر جانے کی منصوبہ بندی ہی عوام کو مہنگائی، بے روزگاری اور معاشی تباہی سے نجات دے گی۔