وزیراعظم عمران خان نے پی ٹی آئی پارٹی رہنماؤں کا اجلاس آج طلب کرلیا جس میں کے پی نتائج کے بعد کی صورتحال اور آئندہ بلدیاتی انتخابات کے حوالے سے حکمت عملی پر تبادلہ خیال ہوگا۔

وزیراعظم عمران خان نے پی ٹی آئی پارٹی رہنماؤں کا اجلاس طلب کرلیا۔

ذرائع کے مطابق اجلاس میں وزیراعظم کی زیر صدارت آج دوپہر 2 بجے ہو گا جس میں ملکی سیاسی اور معاشی صورتحال پر غور ہو گا۔

خیبر پختون خوا کے بلدیاتی انتخابات کے نتائج کے بعد کی صورتحال پر غور کیا جائے گا جب کہ آئندہ بلدیاتی انتخابات کے حوالے سے حکمت عملی پر تبادلہ خیال ہو گا۔

اس کے علاوہ وزیراعظم نے قومی رابطہ کمیٹی برائے کورونا کا اجلاس بھی آج طلب کرلیا۔

ذرائع کے مطابق وزیراعظم کی زیرصدارت اجلاس آج 3 بجے وزیراعظم ہاؤس میں ہوگا۔

اجلاس میں وفاقی وزراء، عسکری و این سی او سی حکام شریک ہونگے، این سی او قومی رابطہ کمیٹی کو ملک میں کورونا کی صورتحال پر بریفنگ دے گی۔

ذرائع کا کہنا ہے کہ اجلاس میں اومیکرون کیسز کے اعدادوشمار پر بھی غور کیا جائے گا، کورونا وائرس اور اومیکرون صورتحال کے پیش نظر اجلاس میں اہم فیصلے متوقع ہیں۔

پنجاب کی سیاسی صورتحال پر بھی اجلاس طلب کرلیا گیا ہے۔

ذرائع کے مطابق وزیراعظم کی زیر صدارت اجلاس آج دن 1 بجے ہوگا جس میں پنجاب کی سیاسی صورتحال کا جائزہ لیا جائے گا۔

ذرائع کا کہنا ہے کہ پنجاب کے بلدیاتی انتخابات کی حکمت عملی پر مشاورت ہو گی، پنجاب میں پی ٹی آئی کے انتظامی امور پر بھی بریفنگ دی جائے گی۔