چیئرمین پاکستان پیپلز پارٹی بلاول بھٹو زرداری کا کہنا ہے کہ آمرانہ قوتوں نے ملک کو بابائے قوم کے وژن سے دور لے جانے کی کوششیں کی۔

 چیئرمین پاکستان پیپلز پارٹی بلاول بھٹو زرداری نے قائد اعظم ڈے پر خصوصی پیغام دیتے ہوئے کہا ہے کہ قائد اعظم کا خواب تھا کہ برصغیر کے مسلمانوں کے لیے مساوات پر مبنی ایک ملک ہو۔

چیئرمین پاکستان پیپلز پارٹی نے کہا کہ مسلمانوں کے لیے ایسا ملک جہاں وہ پرامن بقائے باہمی کی بنیاد پر رہ سکیں۔

 بلاول بھٹو زرداری نے کہا کہ پاکستان پیپلز پارٹی اور جمہوری قوتوں نے ہمیشہ ناقابلِ فراموش جدوجہد کے ذریعے ایسی  سازشوں کو ناکام بنایا ہے۔

 انہوں نے کہا کہ ذوالفقار علی بھٹو نے ملک کی معیشت  مضبوط اور ایٹمی پروگرام سے دفاع کو مضبوط بنانے کی بنیاد رکھ کر قائداعظم کے خواب کو پورا کیا تھا۔

بلاول بھٹو زرداری نے کہا کہ شہید محترمہ بینظیر بھٹو نے قائد کے پاکستان کو ایک فلاحی ریاست بنانے کے لیے اقدامات کیے۔

انہوں نے کہا کہ پاکستان کے عوام اور پاکستان پیپلز پارٹی قائداعظم محمد علی جناح کے وژن اور مشن پر سختی سے کاربند رہیں گے۔

انہوں نے مزید کہا کہ پیپلز پارٹی نظریہ پاکستان کی حقیقی علمبردار ہے۔

بابائے قوم قائدِ اعظم محمد علی جناح کا یوم پیدائش آج ملک بھر میں قومی جوش و جذبے سے منایا جارہا ہے۔

بابائےقوم کی یوم پیدائش کے موقع پر سرکاری سطح پر پاکستان میں تعطیل ہے اور قائدِ اعظم محمد علی جناح  کو خراجِ تحسین پیش کرنے کے لیے خصوصی تقریبات ، سیمینارز ، کانفرنسز ، مذاکروں، مباحثوں کا انعقاد کیا گیا ہے۔

محمد علی جناح 25دسمبر 1876ء کو پیدا ہوئے،انہوں نے ابتدائی تعلیم کا آغاز 1882ء میں کیا، وہ 1893ء میں اعلیٰ تعلیم کے حصول کیلئے انگلستان روانہ ہوگئے وہاں سے انہوں نے 1896ء میں بیرسٹری کا امتحان پاس کیا اور وطن واپس آ گئے۔

جس کے بعد قائد اعظم محمد علی جناح نے سیاسی زندگی کا آغاز کرتے ہوئے انڈین نیشنل کانگریس میں باقاعدہ شمولیت اختیارکی لیکن کچھ عرصے بعد انہیں احساس ہوا کہ کانگریس صرف ہندوؤں کی نمائندہ جماعت ہے جہاں مسلمانوں کے ساتھ امتیازی سلوک برتا جاتا ہے،اس دوران انھوں نے خود مختار ہندوستان میں مسلمانوں کے سیاسی حقوق کے تحفظ کی خاطر مشہور چودہ نکات پیش کیے۔

قائدِ اعظم محمدعلی جناح کی زندگی جرات، ان تھک محنت، دیانت داری، عزمِ مصمّم ، حق گوئی کا حسین امتزاج تھی، برصغیر کی آزادی کے لیے بابائے قوم کا مؤقف دو ٹوک رہا، نہ کانگریس انھیں اپنی جگہ سے ہلا کسی نہ انگریز سرکار ان کی بولی لگا سکی۔