سینیٹ میں اپوزیشن لیڈر سید یوسف رضا گیلانی نے کہا ہے کہ قائد اعظم محمد علی جناح نے جدوجہد سے ہمیں آزاد مملکت کا تحفہ دیا۔

تفصیلات کے مطابق یوسف رضا گیلانی نے کرسمس اور بانی پاکستان کی سالگرہ پر پیغام جاری کرتے ہوئے کہا کہ تمام مسیحی برادری کو کرسمس کی مبارک باد پیش کرتا ہوں۔

ان کا کہنا تھا کہ بحثیت مسلمان ہم اللہ تعالیٰ کے عظیم پیغمبر حضرت عیسیٰ علیہ السلام کا احترام کرتے ہیں، حضرت عیسیٰ علیہ السلام کو دنیا میں امن، محبت، بھائی چارے اور انسانیت کے احترام کی علامت کے طور پر بھیجا گیا۔

انہوں نے کہا کہ قائد اعظم محمد علی جناح نے اپنی انتھک محنت اور جدوجہد سے ہمیں آزاد مملکت کا تحفہ دیا، قائد اعظم نے رنگ و نسل، مذہبی، لسانی اور کسی تفریق کے بغیر تمام شہریوں کو زندگی گزارنے کے لئے پاکستان کا تحفہ دیا۔

سینیٹ میں اپوزیشن لیڈر سید یوسف رضا گیلانی کا مزید کہا کہ پاکستان کی تعمیر و ترقی اور خوشحالی کے لئے بانی پاکستان کے افکار پر چلنا ہوگا۔

واضح رہے کہ پاکستان سمیت دنیا بھر میں مسیحی برادری حضرت عیسیٰ علیہ السلام کی ولادت کی مناسبت سے کرسمس کا تہوار منا رہی ہے۔

دنیا بھر کی طرح پاکستان میں بھی کرسمس کے تہوار کا باقاعدہ گزشتہ رات گرجا گھروں میں منعقدہ خصوصی دعائیہ تقریبات سے ہوا۔ صبح ہوتے ہی مسیحی برادری اپنے پیاروں، عزیزوں اور اقارب کو مبارک باد دے رہے ہیں اور روایتی انداز میں تحفے تحائف کا تبادلہ کیا جارہا ہے۔

مسیحی برادری نے اپنے گھروں، محلوں اور عبادت گاہوں کو خصوصی برقی قمقموں، کرسمس ٹریز اور ڈیوڈ اسٹارز سے سجا رکھا ہے۔

دوسری جانب ملک میں دہشت گردی کے خدشات کے پیش نظر سیکیورٹی بھی ہائی الرٹ کی گئی ہے۔