وزیر اعلیٰ پنجاب سردار عثمان بزدار نے کہا ہے کہ بین الاقوامی یونیورسٹیاں لاہور ٹیکنو پولس اپنے کیمپس قائم کریں گی۔

وزیر اعلیٰ عثمان بزدار سے صوبائی وزیر ہائر ایجوکیشن راجہ یاسر ہمایوں کی ملاقات ہوئی جس میں ہائرایجوکیشن کے امور پر تبادلہ خیال کیا گیا۔

ملاقات صوبائی وزیر راجہ یاسر ہمایوں نے وزیر اعلیٰ پنجاب کو ہائر ایجوکیشن سے متعلق اقدامات سے آگاہ کیا۔

عثمان بزدار نے کہا کہ سابق حکومت منصوبوں کے اعلان تو کرتی گئی لیکن عملی طورپرکوئی کام نہیں کیا، لاہورنالج پارک کا منصوبہ بھی ان کی نااہلی کا منہ بولتا ثبوت ہے۔

انہوں نے کہا کہ 10سال تک اس منصوبے پر عملی طورپر کوئی کام نہیں کیا گیا۔ تحریک انصاف کی حکومت نے لاہور ٹیکنو پولس کے منصوبے پر کام کا آغاز کردیا ہے۔

وزیر اعلیٰ پنجاب نے کہا کہ یہ پراجیکٹ علم اور انٹرپرائزمیں عمدگی کے ویژن کے تحت قائم کیا جارہا ہے، بین الاقوامی یونیورسٹیاں لاہور ٹیکنو پولس میں اپنے کیمپس قائم کریں گی۔

انکا کہنا ہے کہ ایمرجنگ ٹیکنالوجی اور اسٹیٹ آف دی آرٹ پراڈکٹس کی ریسرچ پر توجہ دی جائے گی، نوجوانوں کو کاروباری تربیت اورمواقع فراہم کرنے کے ساتھ ساتھ اپنے کاروبار کیلئے فنڈز بھی دیئے جائیں گے۔

عثمان بزدار نے کہا کہ جدید تعلیم ہر بچے کا حق ہے اورہماری حکومت یہ حق اپنے بچوں کو واپس کررہی ہے، ہر ضلع میں یونیورسٹی بننے سے طلبہ کو گھر کے قریب اعلیٰ تعلیم کے مواقع ملیں گے۔

 انہوں نے مزید کہا کہ تعلیم دوست اقدامات کی بدولت عالمی اور ایشیائی رینکنگ میں پنجاب کی 21یونیورسٹیاں شامل ہوئی ہیں اور صوبے میں اسمارٹ یونیورسٹی کا کونسپٹ متعارف کرایا جارہا ہے۔

 واضح رہے کہ چیئرمین نالج پارک جمال انصاری، چیف ایگزیکٹو آفیسر ریپڈ سلیکون نوید شیروانی، وائس چانسلرآئی ٹی یونیورسٹی سرفراز خورشید اورمحمد ہمایوں قیوم بھی اس موقع پر موجود تھے۔