حریت رہنما عبدالحمید لون نے بتایا ہے کہ دسمبر کے مہینے میں قابض فوجیوں نے جعلی مقابلوں میں 19 کشمیریوں کو شہید کیا ہے۔

حریت رہنما عبدالحمید لون کا کہنا تھا کہ بھارتی فورسز نے مقبوضہ کشمیر میں نام نہاد سرچ آپریشن تیز کردیے، روزانہ بھارتی قابض فورسز سرچ آپریشن سے کشمیریوں کو ہراساں کرنا معمول بن گیا۔

انہوں نے بتایا کہ بے گناہ کشمیریوں کو گرفتاریوں کے بعد جعلی مقابلوں میں قتل کردیا جاتا ہے، دسمبر کے مہینے میں قابض فوجیوں نے جعلی مقابلوں میں 19 کشمیریوں کو شہید  کردیا۔

کشمیری روزانہ قتل، گرفتاریاں، تشدد اور اپنی املاک کی تباہی کا مشاہدہ کر رہے ہیں، جنوری 1989 سے نومبر 2021 تک بھارتی فوجیوں کے ہاتھوں 95,917 کشمیریوں کو قتل کیا گیا۔

یہ بھی پڑھیں:بھارتی فوجیوں نے گزشتہ 3 برس کے دوران 651 کشمیریوں کو شہید کیا

عبدالحمید لون کا کہنا تھا کہ بھارت نے معصوم کشمیریوں کے خلاف ظلم و بربریت کے تمام ریکارڈ توڑ دیے ہیں، بھارتی جبر نے کشمیر کو اس کے باشندوں کے لیے زندہ جہنم میں تبدیل کر دیا ہے۔

انکا مزید کہنا تھا کہ بھارت وحشیانہ قتل و غارت گری کا سہارا لے کر کشمیریوں کو محکوم نہیں بنا سکتا لیکن مودی سرکار کی تباہ کن پالیسیاں کشمیریوں کی جذبہ حریت کو ختم نہیں کرسکتی۔

عبد الحمید لون نے مزید کہا کہ ہر شہادت کشمیریوں کی جدوجہد آزادی میں نئی ​​روح پھونک دیتی ہے، کشمیریوں کا بے رحمانہ قتل  عالمی برادری کے لیے ایک چیلنج بن چکا ہے۔

عبدالحمید لون نے بتایا کہ مقبوضہ کشمیر میں انسانیت کا قتل عام کیا جارہا ہے، عالمی دنیا کو کشمیریوں کے بے دریغ قتل عام کو روکنے کے لیے عملی اقدام کرنا ہونگے۔