وزیر اعلیٰ پنجاب سردار عثمان بزدار نے کینال کمانڈ ایریا رولز میں رد و بدل کی اصولی منظوری دے دی ہے۔

سردار عثمان بزدار کی زیرِ صدارت اعلیٰ سطح کا اجلاس ہوا جس میں سیکرٹری آبپاشی نے بریفنگ دی جبکہ اس موقع پر صوبائی وزیر آبپاشی سردار محسن لغاری، پرنسپل سیکرٹری وزیر اعلیٰ، سیکرٹری زراعت اور متعلقہ حکام نے اجلاس میں شرکت کی۔

وزیر اعلیٰ پنجاب سردار عثمان بزدار نے صوبے کی نہروں میں اضافی پانی کو استعمال میں لانے کیلئے بڑا اقدام لیا، بزدار حکومت نے 1873 کے کینال کمانڈ ایریا رولز تبدیل کرنے کا اصولی فیصلہ کرلیا۔

عثمان بزدار نے کینال کمانڈ ایریا رولز میں رد و بدل کی اصولی منظوری دے دی، ان کا کہنا تھا کہ نئے رولز کو کابینہ سٹینڈنگ کمیٹی برائے قانونی امور کی منظوری کے بعد پنجاب کابینہ میں پیش کیا جائے گا۔

انہوں نے کہا کہ 150 سالہ پرانے اور فرسودہ قوانین کو بدل کر جدید تقاضوں سے ہم آہنگ نظام متعارف کروایا جا رہا ہے، کینال کمانڈ ایریا ایڈجسٹمنٹ رولز میں رد و بدل سے کاشتکاروں کو بے پناہ ریلیف ملے گا۔

ان کا کہنا تھا کہ نہروں کا اضافی پانی استعمال میں لائے جانے سے زرعی شعبہ ترقی کرے گا، اضافی پانی کے حصول کیلئے ویب سائٹ پر آن لائن درخواستیں دی جاسکیں گی، پہلے آئیے، پہلے پائیے کی بنیاد پر درخواستوں پر کارروائی ہوگی۔