صوبائی وزیر ہائیر ایجوکیشن راجہ یاسر ہمایوں نے کہا ہے کہ کورونا کے بعد عام آدمی کی غذائی ضروریات بڑی حد تک متاثر ہوئیں۔

لاہور کے مقامی ہوٹل میں متوازن خوراک کی فراہمی کے حوالے سے سیمینار کا انعقاد ہوا جس میں صوبائی وزیر ہائیر ایجوکیشن راجہ یاسر ہمایوں بحثیت مہمان خصوصی شریک ہوئے۔

صوبائی وزیر راجہ یاسر کا کہنا تھا کہ کورونا کے بعد عام آدمی کی غذائی ضروریات بڑی حد تک متاثر ہوئیں، محفوظ اور متوازن خوراک کا حصول انسان کا بنیادی حق ہے۔

انہوں نے کہا کہ حکومت لوگوں کو صحت کے ساتھ ساتھ متوازن خوراک پہنچانے کے مختلف منصوبوں پر کام کر رہی ہے، متوازن غذا نہ ملنے سے مختلف بیماریاں جنم لے رہی ہیں۔

ان کا کہنا تھا کہ بدقسمتی سے ہماری غذا مکمل طور پر متوازن اور صحت بخش نہیں، حکومت نے احساس لنگر پروگرام کے ذریعے غریب اور متوسط طبقے کو بڑا ریلیف دیا ہے، پناہ گاہوں کا قیام تحریک انصاف گورنمنٹ کا غریب عوام کے لیے بڑا ریلیف ہے۔

راجہ یاسر ہمایوں نے کہا کہ ڈسٹری بیوشن نیٹ ورکس کے ساتھ مل کر متوازن فوڈ کی فراہمی کے لیے اقدامات کر رہے ہیں، پرائیویٹ سیکٹر کا اس اہم ذمہ داری میں حصہ دار بننا ایک خوش آئند اقدام ہے، متوازن خوراک کی فراہمی سے صحت کے مسائل حل کیے جا سکتے ہیں۔

 صوبائی وزیر ہائیر ایجوکیشن راجہ یاسر ہمایوں کا مزید کہنا تھا کہ ریسرچ کے اداروں اور انڈسٹری کے تعاون سے صورت حال میں بہتری کے واضح امکانات ہیں۔

وائس چانسلر جی سی یو فیصل آباد ڈاکٹر شاہد کمال نے پروگرام میں شرکت کی جبکہ پارلیمانی سیکرٹری شکیل شاہد اور پروجیکٹ ہیڈ ڈاکٹر عمر ارشد بھی پروگرام میں شریک ہوئے۔