امریکی ریاست کولوراڈو کے شہر ڈینور میں فائرنگ کا واقعہ پیش آیا ہے ۔

مقامی میڈیا کی رپورٹ کے مطابق مسلح شخص کی فائرنگ سے دو خواتین سمیت چار افراد ہلاک اور ایک پولیس آفیسر سمیت متعدد  افراد زخمی ہوگئےہیں۔

پولیس حکام کا کہنا ہے کہ جوابی فائرنگ میں فائرنگ کرنے والا مشتبہ شخص بھی مارا گیاہے۔

ڈینور پولیس کے سربراہ پال پازن نے ایک نیوز کانفرنس میں بتایا کہ فائرنگ کا واقعہ شام 5 بجے کے بعد وسطی ڈینور میں پیش آیا   جہاں ابتدائی طور پر دو خواتین ہلاک اور ایک شخص زخمی ہوا ۔

انہوں نے مزید بتایا کہ پھر مسلح شخص ایک کار میں فرار ہو ا اور مشرقی ڈینور کے چیز مین پارک محلے میں ایک شخص کو گولی مار کر ہلاک کر دیا ۔

پازن نے بتایا  کہ اس کے بعد مشتبہ شخص نے گاڑی میں بیٹھے ہوئے دو بار فائرنگ کا تبادلہ کرکے وہاں سے فرار ہوگیا ۔

لیک ووڈ پولیس کے ترجمان جان رومیرو کے مطابق مسلح شخص اس کے بعد ہمسایہ شہر لیک ووڈ میں داخل ہوا جہاں اس نے ایک  اور شخص کو گولی مار کر ہلاک کر دیا۔

لیک ووڈ پولیس نے مشتبہ شخص کو گاڑی سے اتارنے کی کوشش کی جس دوران وہ گاڑی چھوڑ کر فائرنگ کرتے ہوئے پیدل فرار ہوگیا۔

رومیرو نے بتایا کہ مسلح شخص ایک ہوٹل میں داخل ہوا، جہاں اس نے ہوٹل کے ایک ملازم کو گولی مار کر زخمی کر دیا۔  اس کے بعد اس نے دوبارہ پولیس اہلکاروں پر گولیاں  چلائیں جس سے اہلکار زخمی ہو گیا  تاہم اس کے مزید نقصان پہنچانے سے پہلے پولیس نے اسے گولی مار کرہلاک کردیا۔