بچوں میں جنسی ہراسانی سے متعلق آگاہی کیلیے پاکستان کی پہلی اینیمیٹڈ سیریز ’سُپرسوہنی‘ ریلیز کیلیے تیار ہوگئی ہے۔

لاہور کے معروف سماجی ادارے ’ سماج ‘ نے پاکستان میں جرمنی کے سفارت خانے کے تعاون سے اینیمیٹڈ سیریز تیار کی ہے۔

’سُپر سوہنی‘ کے نام سے بنائی گئی اس اینیمیٹڈ سیریز کا مقصد بچوں کے ساتھ ہونے والے جنسی ہراسانی کے واقعات کے حوالے سے آگہی فراہم کرنا اور ان کی روک تھام ہے۔

10 اقساط پر مبنی ’سُپر سوہنی‘ کی پہلی قسط جمعہ31 دسمبر کو سوشل میڈیا(انٹرنیٹ) پر ریلیز کی دی جائے گی۔

پاکستان میں جرمنی کے سفارت کار برنارڈ شلاگ ہیک نے ’سُپر سوہنی‘ کا ٹیزر بھی ٹوئٹر پر شیئر کیا ہے۔

ہمارے پارٹنرز @TheSamaaj جنسی ہراسانی جیسے سنگین مسئلے پر آگاہی اجاگر کرنے کے لیے ایک ویڈیو سیریز شروع کر رہے ہیں۔ یہ کافی اہم پراجیکٹ ہے جس سے مجھے امید ہے کہ بچے اپنے آپ کو اس قسم کے واقعات سے محفوظ رکھنے کے لئے بہت کچھ سیکھ سکیں گے۔ مجھے اس پراجیکٹ کا شدت سے انتظار ہے! pic.twitter.com/IpMnSI1Io9

— Bernhard Schlagheck (@GermanyinPAK) December 12, 2021

برنارڈ شلاگ ہیک نے امید ظاہر کی ہے کہ ’سُپر سوہنی‘ کے ذریعے بچوں میں بیدار ہونے والا شعور انہیں ایسی صورت حال سے نمٹنے میں مددگار ثابت ہوگا۔

’سُپر سوہنی‘ بنانے والی سماجی تنظیم ’سماج‘ کی ایگزیکٹو ڈائریکٹر سحر مرزا کا کہنا ہے کہ اینیمیشن بچوں کی توجہ حاصل کرنے اور سکھانے کے لیے بہترین طریقہِ اظہار ہے۔

مزید پڑھیے : آن لائن ہراسانی کی شکایات میں 189 فیصد اضافہ

سحر مرزا نے مزید کہا کہ بچوں کے ساتھ جنسی جرائم اکثرشرم اور بے عزتی کے خوف سے درج ہی نہیں ہوتے، سُپر سوہنی دیکھنے کے بعد بچوں کو ناصرف جنسی ہراسیت کی مختلف اقسام سے آگہی ملے گی بلکہ اس کے بعد وہ اپنے والدین یا نگرانوں سے اس مسئلے پر بلا خوف بات کر سکیں گے۔

’سُپر سوہنی‘ کو تحریری شکل دینے والے قلمکارابدال احمد جعفری کا کہنا تھا کہ اُمید ہے کہ یہ سیریز مستقبل میں بچوں کے ساتھ رونما ہونے والے واقعات کی روک تھام میں مدد گار ثابت ہو گی۔