شیخ رشید نے کہا ہے کہ اسلام آباد میں جنوری کے پہلے ہفتے میں ریسکیو 1122 شروع کردیں گے۔

 وزیر داخلہ شیخ رشید نے بلیو ایریا غوثیہ پلازہ آگ لگے مقام کا دورہ کیا ، ڈی سی اسلام آباد نے آگ کی جگہ کا معائنہ کروایا۔

شیخ رشید نے میڈیا سے گفتگو کرتے ہوئے کہا کہ اسلام آباد انتظامیہ نے بروقت آگ پر قابو پالیا ہے ، ڈی اسلام آباد موقع پر موجود ہیں ، بروقت امدادی کام کیا گیا۔

انہوں نے کہا کہ  فائر فائٹر ریسکیو ٹیموں نے گیارہ لوگوں کی جان بچائی ہے ، اسلام آباد میں جنوری کے پہلے ہفتے میں 1122 شروع کردیں گے۔

وزیر داخلہ شیخ رشید نے کہا کہ مالک کے خلاف پرچہ اور گرفتاری کے آرڈر دیے ہیں کہ اسے فوری طور پر گرفتار کیا جائے۔

واضح رہے کہ وفاقی دار الحکومت کے بڑے بزنس ایریا غوثیہ پلازہ جناح ایونیو بلیو ایریا کی بیسمنٹ میں اچانک آگ بھڑک اٹھی تھی۔

فائر بریگیڈ کا عملہ آگ بجھانے میں مصروف تھا، ابتدائی رپورٹ کے مطابق آگ شارٹ سرکٹ کے باعث لگی تھی۔

بیسمنٹ اور پلازہ میں قائم تمام دفاتر کے لوگوں نے بھاگ کر اپنی جان بچائی آگ پر کسی حد تک قابو پایا گیا تھا مزید آگ کو  بجھانے کی کوششیں کی جارہی تھیں۔

پلازہ میں سیڑھیوں کے راستے میں دھواں بھر گیا تھا، دوسری اور تیسری منزل میں  پھنسے لوگوں کو سیڑھی لگا کر نکالا گیا۔