دنیا بھر میں کورونا وائرس کے ویریئنٹ اومیکرون کا تیزی سے پھیلاؤ جاری ہے۔ فرانس میں یومیہ کورونا کیسز (مشتبہ اومیکرون ) ریکارڈ 2 لاکھ کی سطح عبور کرگئے ہیں۔

فرانسیسی وزیر صحت اولیور ویران کا کہنا ہے کہ وزارت صحت  نے گزشتہ 24 گھنٹوں کے دوران 2 لاکھ 8 ہزار  کورونا کیسز ریکارڈ کیے ہیں۔

انہوں نے کہا کہ ایک روز میں  2 لاکھ سے زائد کیسز کا ریکارڈ ہونا نہ صرف فرانس بلکہ پورے یورپ میں  ایک ریکارڈ ہے۔

ویران  نے کہا کہ گزشتہ روز 24 گھنٹوں کے دوران تقریباً  ایک لاکھ 80 ہزار نئے کیسز سامنے آئے تھے جو کہ گزشتہ روز تک ریکارڈ یومیہ  کیسز تھے۔

وزیر صحت نے مزید بتایا کہ ہر ایک سیکنڈ میں دو فرانسیسی شہری کورونا وائرس  (مشتبہ اومیکرون ) کا شکار ہورہے ہیں۔

دنیا بھر میں اومیکرون کیسز میں 11 فیصد اضافہ، عالمی ادارہ صحت نے خبردار کردیا

عالمی ادارہ صحت نے دنیا کو خبردار کیا ہے کہ کورونا وائرس کا اومیکرون  ویریئنٹ تیزی سے پوری دنیا کو اپنی لپیٹ میں لے سکتا ہے۔

عالمی ادارہ صحت نے  ہدایت کی ہے کہ اس سے نمٹنے کے لیے فوری طور پر سخت اقدامات کیے جائیں  بصورت دیگر یہ بہت خطرناک ثابت ہوسکتا ہے ۔

واضح رہے کہ عالمی ادارہ صحت کی  وبائی امراض سے متعلق ہفتہ وار رپورٹ میں بتایا گیا ہے کہ  گزشتہ ایک ہفتے  میں دنیا بھر میں  اومیکرون کیسز میں 11 فیصد اضافہ ہوا  ہے  جن میں سب سے زیادہ کیسز امریکا  میں رپورٹ ہوئے ہیں۔

رپورٹ میں بتایا گیا ہے کہ   دنیا بھر میں 20 سے 26 دسمبر کے دوران  4.99 ملین نئے کیسز رپورٹ ہوئے ہیں جن میں 2.84 ملین صرف یورپ میں رپورٹ ہوئے ہیں۔

امریکا میں نئے کیسز  کی تعداد 39 فیصد اضافے کے بعد 1.47 ملین رہی جبکہ افریقا میں 7 فیصد اضافے کے بعد نئے رپورٹ ہونے والے کیسز کی تعداد 2 لاکھ 75  ہزار رہی۔