جونیئر ٹیبل ٹینس پلیئر مہک انور طویل علالت کے بعد 16سال کی عمر میں انتقال کر گئیں۔

تفصیلات کے مطابق مہک انور کینسر کےمرض میں مبتلا تھیں، مہک انور کیسنر کے مرض میں مبتلا رہنے کے بعد آج کم عمری میں ہی انتقال کرگئیں۔

یاد رہے کہ مہک انور ٹیبل ٹینس کی کھلاڑی ہیں اور گزشتہ سال 24ویں جونیئر اینڈ کیڈٹ ٹیبل ٹینس چیمپیئن شپ میں سندھ کی نمائندگی کر چکی ہیں۔

واضح رہے کینسر کے عارضے میں مبتلا مہک انور کے والدین کے پاس اپنی بیٹی کے علاج کے لیے پیسے ختم ہوگئے تھے جس کے بعد مہک کے والدین نے اپنی بیٹی کے علاج کے لیے قرض بھی لیا تھا۔

مہک کے والد نے وزیراعظم عمران خان سے اپیل کی تھی کہ وہ مہک کے علاج میں تعاون کریں، لیکن حکومت کے اعلان کے باوجود مہک انور کی مالی مدد نہیں کی جاسکی۔

ایک ویڈیو میں مہک کے والد نے کہا تھا کہ ‘میری وزیراعظم عمران خان سے اپیل ہے کہ وہ کھلاڑی ہونے کی حیثیت سے مہک انور کے علاج میں ہمارے ساتھ تعاون کریں اور مہک کی جان بچانے میں ہماری مدد کریں۔’

مہک انور کی بہن کا کہنا تھا کہ مہک کا علاج 6 سے 7 ماہ جاری رہا تو شفا ممکن ہے اور ہر ماہ 2 کیمویونی ہے لیکن اب علاج کے لیے پیسے نہیں ہیں۔

وزیراعظم عمران خان نے کینسر میں مبتلا ٹیبل ٹینس کی کھلاڑی مہک انور کی بیماری کو نوٹس لے لیا تھا، وزیراعظم عمران خان کی ہدایت پر پی ٹی آئی کے وفد نے مہک انور سے ملاقات بھی کی تھی، اس کے باوجود مہک کے علاج کے لیے مالی معاونت نہیں کی گئی جبکہ سابق کپتان شاہد آفریدی نے مہک کے علاج کیلئے پانچ لاکھ روپے دیئے تھے۔

دوسری جانب وفاقی وزیر اطلاعات نے ٹویٹر میں وضاحت کرتے ہوئے کہا تھا کہ ‘وزیر اعظم اپنے صوابدیدی فنڈز سے پہلے ہی دست بردار ہو چکے ہیں، علاج کا حکم دے چکے ہیں لیکن انفرادی مالی امداد اب وزیر اعظم کا اختیار نہیں’۔