صدر مملکت ڈاکٹرعارف علوی نے کہا ہے کہ پاک چین دوستی مفادات سے بالاتر ہے، دونوں ممالک خطے میں امن اور ترقی چاہتے ہیں۔

تفصیلات کے مطابق صدر پاکستان ڈاکٹرعارف علوی نے ایکسپو سینٹر لاہور میں چائنیز ایگرو کیمیکلز کی نمائش کا افتتاح کیا۔

اس موقع پرصدرِ مملکت ڈاکٹر عارف علوی نے کہ خطے میں بہت سے ماحولیاتی مسائل کا سامنا ہے، سارک جیسے ریجنل فورم پر ان مسائل کو اجاگر کرنے کی ضرورت ہے۔

صدر پاکستان نے یہ بھی کہا کہ سپر پاور سمجھنے والےبعض ممالک خود اپنے لوگوں کے لیے مسائل پیدا کر رہے ہیں، وہ اقلیتوں کے ساتھ بدترین رویہ رکھےہوئے ہیں، بابری مسجد اس کی ایک مثال ہے

ڈاکٹرعارف علوی نے مزید کہا کہ پاک چین فری ٹریڈ کا دوسرا فیز دسمبرمیں شروع ہورہا ہے، ہم سیڈ ڈیولپمنٹ جیسی چیزوں میں چین سے رہنمائی لے سکتے ہیں۔

عارف علوی کا کہان تھا کہ بھارت خطے کے امن کو خطرے میں ڈال رہا ہے، بھارت سپر پاور بننے کی کوشش کر رہا ہے لیکن خود اپنے ملک میں جنگ جاری رکھے ہوئے ہے۔

صدر مملکت ڈاکٹرعارف علوی کا مزید کہنا تھا کہ بھارت میں مسلمان، سکھ اور عیسائی سمیت کوئی بھی اقلیت محفوظ نہیں جبکہ وزیراعظم عمران خان نے اقوام متحدہ میں چینی سفیر کا کردار ادا کیا۔

واضح رہے اس سے قبل لاہور میں ایک تقریب سے خطاب کرتے ہوئے صدر مملکت ڈاکٹر عارف علوی کا کہنا تھا کہ پاکستانی حکومت اور عوام سیاحت کے فروغ کیلئے کوشاں ہے، میں بھی بذات خود سیاحت کا بےحد شوقین ہوں۔

صدر مملکت ڈاکٹرعارف علوی نے کہا کہ پاکستان قدرتی مناظر سے مالامال ملک ہے جو سیاحوں کیلئے مکمل طور پرکھلا ہے، پاکستانی حکومت سیاحت کے فروغ کیلئے خواہاں ہے، سیاحت سے مختلف تجربات اورنئی جگہیں دیکھنے کا موقع ملتا ہے۔