پولیس نے عدالت کے باہر تین ملزمان کو گرفتار کرلیا جبکہ دو ملزمان وکیل کی گاڑی میں فرار ہوگئے۔

تفصیلات کے مطابق سپریم کورٹ رجسٹری کراچی میں گھرجلانے، جانوروں کو ہلاک اور دو افراد کو زخمی کرنے سے متعلق کیس کی سماعت ہوئی۔

سماعت کے دوران عدالت نے پانچ ملزمان کی ضمانت قبل از گرفتاری کی درخواستیں مسترد کردیں۔

پولیس کی جانب سے کئی گھنٹے تک ملزمان کو گرفتارکرنے کو کوشش کے دوران دو مرکزی ملزمان وکیل کی مدد سے فرار ہونے میں کامیاب ہو گئے جبکہ تین ملزمان کو پولیس نے باہر نکلتے ہی گرفتارکرلیا۔

ملزمان دیدار اور انوررند  وکیل کی گاڑی میں بیٹھ کرفرار ہونے میں کامیاب ہوئے۔ پولیس نے وکیل کی گاڑی روکنے کی کوشش کی مگر ناکام رہی۔

ٹریفک پولیس نے میسج چلایا کہ مذکورہ گاڑی جہاں ملے روک کرملزمان کو پکڑا جائے۔

کیس کی سماعت کے دوران جسٹس محمد علی مظہر نے ریمارکس میں کہا کہ گھرجلانا، جانوروں کو مارنا سنگین جرم ہے۔ ملزمان نے گندم کو آگ لگائی گئی، 25 بکریوں کو ہلاک کیا۔

جسٹس سجاد علی شاہ نے ریمارکس میں کہا کہ تین عدالتیں ضمانتیں مسترد کرچکیں، ہم کیسے دیں۔

وکیل مدعی نے کہا کہ حاصل اوراسحاق کو بٹ مارے گئے جبکہ وکیل ملزمان نے کہا کہ واقعہ پرانی دشمنی ہے، جھوٹا کیس بنایا گیا۔

تفتیشی افسر نے کہا کہ ملزمان کے خلاف کافی شواہد موجود ہیں۔ ملزمان کے خلاف جام شورو کے تھانے میں مقدمہ درج ہے۔