بھارتی اداکارہ و ماڈل مرونل ٹھاکر کورونا وائرس میں مبتلا ہوگئیں۔

اداکارہ نے فوٹو اینڈ ویڈیو شیئرنگ ایپ انسٹاگرام پر ایک پوسٹ شئیر کی ہے۔
اس پوسٹ کے ذریعے اداکارہ نے مداحوں کو بتایا کہ میرا کورونا وائرس ٹیسٹ مثبت آگیا ہے، مجھ میں اس کی علامات کی شدت تو کم ہے لیکن میں بہتر محسوس کررہی ہوں۔

اداکارہ مرونل نے لکھا کہ میں نے خود کو قرنطینہ کرلیا ہے اور اس وقت اپنے معالج کی جانب سے بتائے گئے تمام اقدامات کر رہی ہوں۔

انہوں نے خود سے ملنے والوں سے درخواست کی ہے کہ وہ بھی اپنا کورونا وائرس ٹیسٹ کروالیں۔

واضح رہے کہ منورل ٹھاکر فلم جرسی میں شاہد کپور کے مقابل اداکاری کرتی نظر آئیں گی۔

واضح رہے کہ بھارت میں اومیکرون ویرینٹ کے تیزی سے پھیلاؤ کے باعث فلم جرسی کی ریلیز ملتوی کردی گئی ہے۔

جرسی کی ٹیم کی جانب سے جاری شدہ بیان میں کہا گیا ہے کہ موجودہ حالات کے پیش نظر کورونا وائرس کے حوالے سے نئی گائیڈلائنز کے مطابق ہم نے فیصلہ کیا ہے کہ اس فلم کی تھیٹرز پر ریلیز کو ملتوی کردیں۔

گوتم تینانوڑی کی ہدایتکاری میں بننے والی جرسی اس سے قبل تلگو زبان میں بن چکی ہے اور اس میں مرکزی کردار اداکار نانی نے کیا تھا جبکہ تلگو فلم کی ڈائریکشن بھی گوتم تینانوڑی ہی نے دی تھی۔

یاد رہے کہ فلم جرسی کو 31 دسمبر کو تھیٹرز پر ریلیز ہونا تھا۔