معروف عالم دین اور مبلغ مولانا طارق جمیل کا کہنا ہے کہ نئے سال کی ابتدا گناہ کے بجائے نیکی سے کرنی چاہئیے۔

مولانا طارق جمیل نے اپنے بیان میں کہا کہ ہمیں خود کا آڈٹ کرنا چاہئیے کہ ہمارا یہ سال اللہ کی نظر میں کیسا گزرا، کتنے گناہ ہوئے کتنے بھلائی کے کام ہوئے، کتنی نمازیں چھوٹیں، کتنا سچ بولا کتنا جھوٹ بولا، کتنا حلال کمایا، کتنا حرام کمایا، کتنا لوگوں کو نفع و نقصان پہنچایا۔

مولانا طارق جمیل کا کہنا تھا کہ قیامت کے روز اللہ تعالیٰ سب سے پہلا سوال یہ کرے گا کہ میرے بندے یہ بتا تو نے اپنی عمر کہاں بتائی۔

انہوں نے کہا کہ ہزاروں گھنٹے ہم ضائع کرتے ہیں، ہمیں کبھی دکھ ہی نہیں ہوا۔ ہم آج کتنا ہی چھپا لیں، روز قیامت ہمارا ایک ایک عمل ایک ایک سیاہ کاری کو حضرت آدم علیہ السلام سے لے کر قیامت تک کا آخری انسان دیکھے گا۔

مولانا طارق جمیل نے کہا کہ روز آنے والا دن اور رات شروع ہوتے وقت کہتے ہیں کہ اے بندے تو جو کچھ کرے گا وہ ہم خود میں محفوظ کر لیں گے، اور روز قیامت اللہ کے حکم پر ہمیں وہ سب دکھایا جائے گا۔

ان کا کہنا تھا کہ میری آپ سے گزارش ہے کہ نئے سال کی ابتدا فحاشی، شراب نوشی، گانے بجانے اور زنا سے نہ کی جائے۔

ان کا مزید کہنا تھا کہ آج کل کے بچوں کو ماں باپ نے بھٹکایا، انہیں مشین بنا دیا کہ پڑھو، کسی ماں باپ کو خیال نہ آیا کہ سکھائیں اچھا انسان بنو۔

انہوں نے کہا کہ ہمارے ادارے قصائی ہیں کہ انہوں نے ہماری نسل کو ایک مشین بنا دیا۔ کہیں قرآن نہیں، کہیں نبی ﷺ کی زندگی نہیں تو کیسے پتا چلے گا کہ زندگی کیسے گزارنی ہے۔