مسلم لیگ (ن) پنجاب کی ترجمان عظمیٰ بخاری نے کہا ہے کہ حسان خاور آپکی کارکردگی صرف خاموش سائیں بزدار کی چاپلوسی کرنا ہے۔

عظمیٰ بخاری نے ترجمان پنجاب حکومت کی پریس کانفرنس پر ردِ عمل دیتے ہوئے کہا کہ مسٹر پرچی ترجمان آپکی کارکردگی صرف خاموش سائیں بزدار کی چاپلوسی کرنا ہے، آپ چاپلوسی اور تابعداری میں فیاض چوہان، شہباز گل اور فردوس عاشق کو بھی پیچھے چھوڑنے کے ریس میں لگے ہیں۔

ان کا کہنا تھا کہ نواز شریف اور شہباز شریف ہر درباری وزیر، مشیر کے عصاب پر سوار ہیں، سیاسی بونے خبروں میں زندہ رہنے کے لئے بار بار نواز شریف کا نام استعمال کرتے ہیں۔

انہوں نے کہا کہ حکومتی ترجمانوں نواز شریف کا نام لے کر ”آلو چاٹ “اور ”دہی بھلے“ کی آواز لگانے آجاتے ہیں، عمران خان اور ان کے وزراء کے پاس عوام کو دینے کے لئے کچھ نہیں ہے، اگر اس حکومت سے نواز شریف اور شہباز شریف کا ذکر نکال دیں تو یہ سڑک پر آجائیں۔

ترجمان عظمیٰ بخاری کا کہنا تھا کہ جنم جنم لوٹے اور ہر بوٹ میں فٹ آنے والے لوگ ہمیں ڈیل یا ڈھیل کا درس نہ دیں، عمران خان نے ڈیل کر کے حکومت لی اب جیل کے خوف نئی ڈیل کے لئے ہاتھ پاﺅں مار رہے ہیں، مسلم لیگ (ن) اور نواز شریف اپنے بیانیے ”ووٹ کو عزت دو“ پر قائم و دائم ہیں۔

مسلم لیگ (ن) پنجاب کی ترجمان عظمیٰ بخاری نے مزید کہا کہ مسلم لیگ (ن) عوامی طاقت سے دوبارہ دو تہائی اکثر حاصل کرے گی، آنے والا وقت صرف مسلم لیگ (ن) اور میاں نواز شریف کا ہے۔