کوئٹہ سے دبئی کے درمیان قومی ائیرلائن (پی آئی اے) کی براہ راست پروازیں بحال ہو گئی۔

ڈپٹی اسپیکرقومی اسمبلی قاسم سوری نے بین الاقوامی پروازوں کی بحالی کاافتتاح کیا۔

کوئٹہ سے دبئی ہفتہ وار دو پروازیں ہوں گی، پی آئی اے کی دبئی کے لیے پہلی پرواز 161 مسافروں کو لے کر روانہ ہوئی۔

اس موقع پر ڈپٹی اسپیکرقومی اسمبلی قاسم سوری نے تقریب سے خطاب کرتے ہوئے کہا کہ کوئٹہ سے دبئی فلائٹ عوام کو دیرینہ مطالبہ تھا، دبئی کے لیے پروازوں کا آغاز حکومت کے وعدوں کی تکمیل ہے۔

انہوں نے کہاکہ دبئی پرواز کے لیے بلوچستان کے عوام کو کراچی جاناپڑتا تھا، پی آئی اے نے کورونا کے دوران بہترین کارکردگی کامظاہرہ کیا، برراہ راست پرواز سے بزنس کمیونٹی کو بہت فائدہ ہوگا۔

قاسم سوری کا مزید کہنا تھا کہ کورونا وبا کے دوران دوسرے ملکوں سے پاکستانیوں کی واپسی کیلئے پی آئی اے نے بہترین کام کیا، پی آئی اے کے ماضی کے اسٹیٹس کو بحال کرنا ہے،ادارے کو منافع بخش بنانا ہے، پی آئی اے سے عوام کی امیدیں وابستہ ہیں۔

ڈپٹی اسپیکرقومی اسمبلی نے کہاکہ کورونا سے ائیر لائن انڈسٹری بری طرح متاثر ہوئی،افغانستان میں اقتدار کی تبدیلی کے بعد پی آئی اے کا غیر ملکیوں کو نکالنے کا آپریشن قابل ستائش ہے۔