اپنے پُرتشدد رویے کی وجہ سے بدنام فرانس کی پولیس کا ایک اور گھناؤنا اِقدام سامنے آ گیا۔

فرانس کے شہر کیلیس میں پولیس نے غیر قانونی طور پر مُقیم تارکینِ وطن کو سخت سردی میں اُن کے خیموں سے نکال کر علاقے سے بے دخل کر دیا۔

کل پیش آنے والے اِس غیر انسانی واقعے کی وڈیو ہیومن رائٹس آبزرورز کے ٹوئٹر پیج سے شئیر کی گئی ہے۔

فرانسیسی پولیس نے وڈیو بنانے والے ہیومن رائٹس آبزرورز پر بھی تشدد کیا۔

وڈیو میں کیلیس میں خیمہ لگانے والے تارکینِ وطن کو علاقے سے نکالنے کے لیے پولیس آنسو گیس کا استعمال کرتی دکھائی دے رہی ہے۔

پولیس نے غیر قانونی تارکینِ وطن کے تقریباً 30 خیموں اور 5 ترپالوں کو بھی قبضے میں لے لیا۔

وڈیو میں بعض پولیس اہلکاروں کا تارکینِ وطن کے قیام کی جگہ میں جوتوں پر غلاف چڑھا کر داخل ہونا بھی سوشل میڈیا پر مرکز بحث بنا ہوا ہے۔

واضح رہے کہ اس سے قبل بھی فرانسیسی پولیس اور شہر کے دیگر حکام کی طرف سے انگلینڈ جانے کے لیے کیلیس میں جمع تارکینِ وطن کے خیموں کو چاقو سے کاٹے جانے کی وڈیوز سوشل میڈیا کے ذریعے منظرعام پر آگئی تھیں۔

انسانی حقوق کی مختلف تنظیموں کے علمبرداروں کی جانب سے ان وڈیوز پر شدید ردعمل کا اظہار کیا گیا تھا۔