لداخ: چین نے لداخ بارڈر پر 60 ہزار فوجی تعینات کردیے ہیں جبکہ آمدو رفت کو تیز کرنے کے لیے انفرا سٹرکچر کا کام بھی شروع کردیا گیا ہے۔

غیر ملکی خبر رساں ادارے کے مطابق چین نے بھارتی سرزمین کے مخالف تقریباً 60 ہزار فوجی تعینات کیے ہیں جبکہ اپنی افواج کی نقل و حرکت کو تیز کرنے کے لیے انفراسٹرکچر کا کام بھی شروع کردیا ہے۔

خبر رساں ادارے کے مطابق بڑی تعداد میں چینی فوجی موسم گرما کے دوران اپنی مشقیں مکمل کرکے واپس اپنی تعیناتیوں پر پہنچ گئے ہیں تاہم اب بھی 60 ہزار چینی فوجی بھارت کے مخالف لداخ بارڈر پر موجود ہیں۔

بھارتی میڈیا کے مطابق چین کی جانب سے خطرے کا تاثر اب بھی موجود ہے کیونکہ لائن آف کنٹرول کی دوسری طرف انفراسٹرکچر کی تعمیر کا کام اب بھی جاری ہے۔

بھارتی میڈیا کے مطابق نئی سڑکوں کی تعمیر کا کام دولت بیگ اولڈی کے اطراف کے علاقوں اور پینگونگ جھیل  کے اطراف کیا جارہا ہے۔

دوسری جانب بھارتی نے بھی ممکنہ مہم جوئی کے سلسلے میں اقدامات شروع کردیے ہیں، بھارتی فوج نے تمام پہاڑی علاقوں کو کھول دیا ہے تاکہ فوج کو باآسانی ضرورت پڑنے پر حرکت کروائی جاسکے جبکہ بھارتی فوج اپنی تعداد بڑھانے کا کام بھی شروع کردیا ہے۔

بھارتی میڈٰیا رپورٹس کے مطابق بھارتی فوج نے اپنی انسداد دہشت گردی راشٹریہ رائفلز یونیفارم فورس کے دستوں کو تعینات کرنا شروع کردیا ہے جبکہ بھارت کی جانب سے انفراسٹرکچر کا کام تیز کردیا گیا ہے۔

رپورٹس کے مطابق کئی مقامات پر دونوں افواج ایک دوسرے کے آمنے سامنے موجود ہیں جبکہ ایک دوسرے پر نظر رکھنے کے لیے دونوں ممالک کی جانب سے نگرانی والے ڈرونز بھی تعینات کیے گئے ہیں۔

واضح رہے کہ ان معاملات کے حل کے لیے دونوں ممالک کی فوجوں کے درمیان بات چیت کا عمل جاری ہے جبکہ مسلسل کوششوں کے بعد کئی مقامات پر معاملات بھی طے پاگئے ہیں۔