رکن قومی اسمبلی اور پاکستان تحریک انصاف (پی ٹی آئی) کے رہنما عامر لیاقت حسین نے ایک مرتبہ پھر وزیراعظم عمران خان سے معافی مانگ لی۔

ٹوئٹر پر جاری اپنے پیغام میں عامر لیاقت حسین نے کہا کہ “میرے عزیز پی ٹی آئی کے ساتھیوں، میرا وزیر اعظم عمران خان کے ساتھ ایک اٹوٹ رشتہ ہے جو کبھی ختم نہیں ہوسکتا، جو بھی بات آپ کو بری لگی ہے وہ یقیناً آپ کو بری لگنی چاہیے۔ لیکن بات کا تناظر چھپانا سب سے بری بات ہے۔”

عامر لیاقت نے اپنی صفائی میں مزید کہا کہ “خان صاحب آپ کو شرم نہیں آتی ، شرم آتی ہے تو آتا ہے، یہ پورا جملہ آپ پڑھ لیں، پھر میں چپ ہو گیا۔ اس کے بعد میں نے کہا کہ شرم آتی ہے تو آتا ہے اور اقوام متحدہ میں آتا ہے۔ وہاں آتا ہے اور پھر وہاں آکر خطاب کرتا ہے۔ لیکن میری بات کے بیچ کے حصے کو کاٹ کر اگلا حصہ نہیں دکھایا گیا۔”

ان کا مزید کہنا تھا کہ ” لیکن اس سب کے باوجود بھی میں آپ سب سے معذرت خواہ ہوں، میں خان صاحب سے بھی معذرت چاہتا ہوں معافی مانگتا ہوں اور میں ان  کے پاس جاکر بھی ان سے معافی مانگوں گا۔”

انہوں نے کہا کہ ان کا عامر ایسا نہیں ہے ، ان کا عامر انہیں بہت چاہتا ہے،  بہت محبت کرتا ہے اور دل سے محبت کرتا ہے۔”

عامر لیاقت نے کہا کہ “میں اپنے جملے پر قائم ہوں کہ جو حکومتیں مسجد  گراتی ہیں وہ ہماری نہیں ہوتیں، تو ہماری حکومت تو کوئی مسجد گرا ہی نہیں رہی۔ تو پھر یہ ہماری حکومت کیسے ہوگئی۔”

وزیر اعظم جناب عمران خان جو میرے پارٹی چیئرمین لیڈر اور رہبر کے ساتھ ساتھ میرے دوست بھی ہیں انہیں یقیناً میرے الفاظ سے ٹھیس پہنچی ہے میں ان سے دل کی گہرائیوں سے معافی مانگتا ہوں اور پی ٹی آئی کے تمام ساتھیوں سے بھی ان کے کارکن بھائی کی حیثیت سے معافی کا طلب گار ہوں@ImranKhanPTI pic.twitter.com/0tAXvHbjJT

— Aamir Liaquat Husain (@AamirLiaquat) January 3, 2022

خیال رہے کہ دو روز قبل عامر لیاقت حسین نے کراچی کے علاقے طارق روڈ پر قائم مدینہ مسجد کا دورہ کیا تھا، یہ وہی مسجد ہے جو مبینہ طور پر پارک کی زمین پر قائم ہے اور جسے سپریم کورٹ نے گرانے کا حکم دیا ہے۔

عامر لیاقت حسین نے اس موقع پر کہا تھا کہ “میرے لیے یہ لفظ بہت اہمیت کا حامل ہے مدینہ ، ریاست مدینہ میں مدینہ مسجد گرا رہے ہیں۔”

ادورانِ گفتگو کسی سے سوال کیا کہ حکومت تو آپ کی ہے اس حوالے سے آپ کیا کہتے ہیں؟

عامر لیاقت حسین نے جواب دیا، “جو مسجدیں گراتی ہے وہ میری حکومت نہیں ہے۔”

اسی شخص نے پوچھا تو کیا خان صاحب کو شرم نہیں آئی؟

اس پر عامر لیاقت نے کہا کہ “ان کو شرم آتی تو وہ آتے۔”

Advertisement

جو مساجد گراتی ہے وہ میری حکومت نہیں
پی ٹی آئی کے ایم این اے عامر لیاقت کی مدینہ مسجد طارق روڈ آمد
عمران خان کے متعلق اھم گفتگو کہا کہ
جو مدینہ کی بات کرتے تھے وہ ہی مدینہ مسجد گرارہیں ۔ا pic.twitter.com/tiWDoVla9N

— RegionalTelegraph (@RegnlTelegraph) January 3, 2022