لاہورہائیکورٹ نے سیکریٹری اسکول ایجوکیشن کو اساتذہ کی بھرتیوں سے متعلق تسلی بخش رپورٹ پیش کرنے کی دوبارہ مہلت دے دی۔

لاہورہائیکورٹ نےاسکولوں میں قرآن پاک کی تعلیم کیلئےاساتذہ بھرتیوں سے متعلق رپورٹ پرعدم اطمینان کا اظہار کرتے ہوئے سیکریٹری ایجوکیشن کو حکم دیا کہ قرآن پڑھانے والے اساتذہ کے تقرراور تربیت سے متعلق بھی جامع رپورٹ پیش کی جائے۔

لاہور ہائیکورٹ کے جسٹس شاہد وحید کی سربراہی میں دو رکنی بنچ نے کیس کی سماعت کی۔ سیکرٹری اسکول ایجوکیشن نے ایڈووکیٹ جنرل پنجاب کی وساطت سے رپورٹ پیش کی۔

رپورٹ میں سیکریٹری اسکول ایجوکیشن نےعدالت کو بتایا کہ حافظ قرآن اساتذہ نے قرآن پاک پڑھانے کیلئے ازخود رضا مندی ظاہرکی ہے۔ جس پر عدالت نے استفسار کیا کہ آپ قرآن کی تعلیم کیلئے علیحدہ سے اساتذہ کیوں بھرتی نہیں کررہے؟

عدالت نے کہا کہ آپ ہمیں طریقہ کار بتائیں کہ پہلی جماعت اوراگلی کلاسسز کے طلباء کو کون اور کیسے قرآن کی تعلیم دی جائے گی؟ جس پر سیکریٹری ایجوکیشن نے کہا کہ قرآن پاک کی تعلیم کیلئے 80 ہزاراساتذہ کی ضرورت ہو گی۔ قرآن مجید کی تعلیم اساتذہ کی بھرتی اور تربیت کا طریقہ کارطےکرلیا ہے۔

سیکریٹری ایجوکیشن نے اساتذہ کی بھرتی کیلئے اخبارمیں اشتہاربھی جاری کیا جائے گا۔ محکمہ خزانہ نے فنڈز کی کمی کے سبب آدھے اساتذہ کی بھرتی کا کہا ہے۔

عدالت نے استفسار کرتے ہوئے کہا کہ اساتذہ بھرتیوں کےمعاملے پر جو رکاوٹ ڈال رہا ہے، عدالت کو اس کا بتائیں۔ کیا وزیراعلی فنڈز کی سمری منظورنہیں کر رہے؟

ایڈووکیٹ جنرل پنجاب نے عدالت سے استدعا کی کہ عدالت مزید جامع رپورٹ پیش کرنے کیلئے مہلت دے جس پر لاہورہائیکورٹ نے ایڈووکیٹ جنرل پنجاب کی استدعا منظورکرلی۔