صوبائی وزیر قانون راجہ بشارت نے کہا ہے کہ ویکسینیشن اور ماسک کے استعمال سے اومیکرون سے عوام محفوظ رہ سکتی ہے۔

وزیر قانون کی زیرِ صدارت کابینہ کمیٹی برائے انسداد کورونا کا وزیر اعلیٰ سیکرٹریٹ میں اجلاس ہوا ہے۔

اجلاس میں صوبائی وزراء ہاشم جواں بخت، ڈاکٹر یاسمین راشد، سپیشل اسسٹنٹ حسان خاور، چیف سیکرٹری ، آئی جی پنجاب، ایڈیشنل چیف سیکرٹری ہوم، سیکرٹری پرائمری ہیلتھ ،سیکرٹری سپیشلائز ہیلتھ ،اور سیکرٹری انفارمیشن سمیت متعلقہ افسران موجود تھے جبکہ ویڈیو لنک کے ذریعے تمام کمشنرز اور ڈپٹی کمشنرز نے اجلاس میں شرکت کی۔

اجلاس میں ڈاکٹر یاسمین راشد نے کورونا مثبت آنے کے باوجود ویڈیو لنک کے ذریعے شرکت کی جس پر وزیر قانون سمیت کمیٹی نے ان کی خدمات کا اعتراف کرتے ہوئے نیک خواہشات کا اظہار کیا۔

اجلاس میں بریفینگ دیتے ہوئے کہا گیا کہ پنجاب بھر میں 50 فیصد لوگ ویکسین لگوا چکے ہیں، جنوری کے اختتام تک 60 فیصد تک عوام ویکسینیشن لگوا چکے ہوں گے۔

راجہ بشارت کا کہنا تھا کہ تمام کمشنرز اور ڈپٹی کمشنرز ویکسینیشن کی تعداد میں اضافہ کریں، جن اضلاع میں ایس او پیز پر عمل درآمد نہیں کیا جائے گا وہاں مجبورا پابندیاں لگائی جا سکتی ہیں۔

ڈاکٹر یاسمین راشد کا کہنا تھا کہ پنجاب میں کسی بھی قسم کی ایمرجنسی سے نمٹنے کے لیے محکمہ صحت نے اپنی استعداد کار میں اضافہ کرلیا ہے۔

راجہ بشارت نے کہا کہ ویکسینیشن اور ماسک کے استعمال سے اومیکرون سے عوام محفوظ رہ سکتی ہے، شادی ہال، ریسٹورنٹ، شاپنگ مال، آفسسز اور بازار سمیت تمام عوامی مقامات ماسک کی پابندی یقینی بنائی جائے۔