برفباری میں پھنسے تین سو افراد بشمول بچوں کو آرمی ڈاکٹرز و پیرامیڈکس نے طبی امداد فراہم کی ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ  بیان کے مطابق ایک ہزار سے زائد پھنسے افراد کوکھانا فراہم کیا گیا ہے۔

ترجمان پاک فوج کے مطابق جھیکاگلی، کشمیری بازار، لوئرٹوپہ اور کلڈنہ میں بھی کھانا فراہم کیا گیا، ملٹری کالج مری، سپلائی ڈپو، اے پی ایس اور آرمی لاجسٹک اسکول میں پناہ اور گرم کھانا و چائے فراہم کی گئی۔

آئی ایس پی آر کے مطابق جھیکاگلی سے ایکسپریس وے اور جھیکاگلی سے کلڈنہ تک راستہ کھل گیا ہے لیکن پھسلن کی وجہ سے ٹریفک نہیں چل رہی۔

اس کے علاوہ گھڑیال سے بھوربن تک راستہ کھلا ہے۔

ترجمان پاک فوج کے مطابق کلڈنہ سے باڑیاں کے درمیان راستے کھولنے کے لئے انجینئیرز اور کلیرنس مشینری مسلسل کام کررہی ہے۔

مری آنے والے راستے آج بھی بند رہینگے، پولیس تعینات

 ڈاکٹر شہباز گل کا کہنا ہےکہ مری کی تمام مین شاہراہوں کو ٹریفک کے لیے کلیئر کر دیا گیا ہے۔

وزیراعظم کے معاون خصوصی برائے سیاسی روابط شہباز گل نے کہاکہ مری سے رات گئے 600 سے 700 گاڑیوں کو نکالا گیا۔

انہوں نے کہاکہ راولپنڈی پولیس، ضلعی انتظامیہ،پاک فوج کے جوان اور ہمارے مقامی لوگ رات بھر متحرک رہے۔

ڈاکٹر شہباز گل نے بتایاکہ راولپنڈی اسلام آباد سے مری آنے والے راستوں پر پولیس موجود ہے، راستے آج بھی بند رہیں گے۔

سانحہ مری؛ جاں بحق افراد کی تعداد 23 ہوگئی

سانحہ مری میں جاں بحق افراد کی تعداد 23 ہوگئی، جب کہ مری کے راستے بدستور بند ہیں۔

بول نیوز کے مطابق مری میں گزشتہ روز برفباری سے بڑے پیمانے پر انسانی جانوں کے ضیاع سے فضا بدستور سوگوار ہے۔

مری سے 14 لاشوں کو راولپنڈی منتقل کردیا گیا ہے۔

مزید پڑھیے : مری میں لوگوں کی موت کی وجہ کاربن مونو آکسائیڈ

پاک فوج کے دستے پولیس اور انتظامی عملے کے ہمراہ امدادی کاموں میں مصروف ہیں، مری کی 90 فیصد سڑکیں کلیئر کرالی گئی ہیں جب کہ وہاں پھنسے سیاحوں کو محفوظ مقامات پر منتقل کردیا گیا ہے۔

راولپنڈی اور اسلام آباد سے مری آنے والے تمام راستے آج بھی بند ہیں، پولیس کی بھاری نفری ان راستوں پر تعینات ہیں۔

مزید پڑھیے: مری میں برفباری کا 10 سالہ ریکارڈ ٹوٹ گیا

موٹر وے پولیس نے عوام سے اپیل کی ہے کہ مری اور گلیات کی طرف غیر ضروری سفر نہ کریں۔

ڈرائیور حضرات سے گزارش ہے کہ تمام ٹریفک اہلکاروں سے تعاون کریں،عوام الناس سے اپیل کی جاتی ہے کہ سفر سے پہلے 130 موٹروے پولیس ہیلپ لائن پر رابطہ کرکے سفری معلومات حاصل کریں۔