مسلم لیگ ن کے رہنماء احسن اقبال نے کہا ہے کہ حکومت کو عدم اعتماد کے ذریعے فارغ کریں۔

احسن اقبال نے نارووال میں میڈیا سے گفتگو کرتے ہوئے کہا کہ تحریک انصاف کی نااہل حکومت نے سوا تین سال میں معاشی طور اور انتطامی طور پر دوالیہ کر دیا ہے، مری کے اندر سیاحوں کے ساتھ اندوناک واقعات ہیں۔

ان کا کہنا تھا کہ 24 گھنٹے کسی قسم کی کوئی امداد نظر نہیں آئی، مری میں سیاح بے سروسامانی کی حالت میں رات گزار رہے تھے، وزیر اعلیٰ پنجاب جن کو فوری پہنچنا چاہیے تھا لاہور میں خوش گپیاں کرتے نظر آئے۔

انہوں نے کہا کہ یہ حکومت ملک کو چلانے کی کوئی دلچسپی نہیں رکھتی ہے، آج پاکستان معاشی، سفارتی، معاشرتی طور بحرانوں میں پھنس چکا ہے، وقت آ گیا ہے پاکستان کو بچائے، ہمارے لئے بہت بڑا موقع ہے میں حکومت کی حلیف جماعتوں سے اپیل کرتا ہوں۔

  رہنماء مسلم لیگ ن کا کہنا تھا کہ پاکستان کے پاس نادر موقع ہے اگر ایم کیو ایم ،ق لیگ، دیگر فوری طور پر حکومت سے علیحدگی اختیار کریں، حکومت کو عدم اعتماد کے ذریعے فارغ کریں، حکومت کی تبدیلی کے بعد پاکستان آئی ایم ایف سے نظر ثانی کی درخواست کر سکتا ہے۔

احسن اقبال نے کہا کہ آئی ایم ایف نے سخت شرائط اس لئے لگائی ہیں یہ نالائق حکومت ہے، اگر ہم اس نالائق، نااہل حکومت کو رخصت کر دیں تو اس بات سے آئی ایم ایف سے معاہدہ پر نظر ثانی کروا سکتے ہیں۔

انہوں نے کہا کہ جو ساڑھے تین سو ارب کے فوری ٹیکس لگنے سے ان پر تباہی صورت میں نازل ہونے والی ہے، حکومت کی حلیف جماعتیں پی ٹی آئی کے ساتھ کھڑی رہیں تو پاکستان خود مختاری، پاکستان کے عوام پر مہنگائی صورت کی برابر شریک ہوں گی۔

ان کا کہنا تھا کہ حکومت کو رخصت کر کے آئی ایم ایف پیکج پر نظر ثانی کروا سکتے ہیں یہ موقع ہمیں کھونا نہیں چاہئے، آئی ایم ایف نے مہر لگا دی تو ہم غلام ہو جائیں گے، اس حکومت نے گیس کا بحران پیدا کر دیا ہے، پاکستان میں بدترین گندم کا بحران آنے والا ہے۔

احسن اقبال نے کہا کہ کسان کو بروقت کھاد نہیں پہنچائی گئی افغانستان اسمگل کی گئی، ان کی نااہلی کا بوج کے ٹو کا پہاڑ بن چکا ہے، ملک ان سے چل نہیں رہا ہاتھ پیر مار رہے ہیں، دس ماہ پہلے آرمی چیف کی اکٹینشن کا ذکر کر کے ایک خطرناک کارڈ کھیلا ہے۔

 انہوں نے کہا کہ پاکستان کے قومی اداروں کو اپنی سیاست میں ملوث نہیں کرنا چاہیے، پاکستان میں آرمی چیف کی تقرری آخری 3 ماہ میں ہوتی ہے، حکومت کے سیاسی کارڈ کی مذمت کرتے ہیں، عمران خان کو اپنی کارگردگی پر جواب دینا ہوگا، جس نے چندہ اکٹھا کرنے پر مدد کی اس وزیر مملکت کے عہدوں پر بٹھا دیا۔

ان کا کہنا تھا کہ پنجاب میں ن لیگ کا مقابلہ کرنے کے لئے حکمران  مذہبی جماعتوں کو فنڈنگ کر رہے ہیں کہ وہ مسلم لیگ ن کا ووٹ توڑنے کے لئے تنظیم سازی کریں، عمران خان کی حکومت کو رخصت کرنے کے لئے ہر پاکستانی کردار ادا کریں۔

احسن اقبال نے کہا کہ پی ڈی ایم کی جماعتیں اپنے لانگ مارچ کا اعلان کر چکی ہے، ہم پیپلز پارٹی کے لانگ مارچ کا خیر مقدم کرتے ہیں، ہم سمجھتے ہیں کہ جتنے اس حکومت کے خلاف لانگ مارچ ہو کم ہیں۔

مسلم لیگ ن کے رہنماء احسن اقبال کا مزید کہنا تھا کہ پیپلز پارٹی لانگ مارچ سے سیاسی موبلیزیشن ہوگی، جس کا ہمیں بھی لانگ مارچ میں فائدہ ہو گا۔