نیویارک: برونکس میں لگنے والی آگ سے اب تک 19 افراد ہلاک ہوچکے ہیں جس میں 9 بچے بھی شامل ہیں۔

نیویارک کے نومنتخب میئر ایرک ایڈمز نے حادثے کو خوفناک قرار دیتے ہوئے کہا کہ نیو یارک شہر کی عمارت میں لگنے والی آگ سے 19 افراد ہلاک ہوگئے ہیں جن میں 9 بچے بھی شامل ہیں۔

میئر کے مطابق ہلاکتوں میں اضافے کا امکان ہے جبکہ یہ آتشزدگی نیویارک کی تیس سالہ تاریخ کی بدترین آتشزدگی ہے۔

میڈیا رپورٹس کے مطابق برونکس کے علاقے ایسٹ 181 اسٹریٹ پر واقع 19 منزلہ عمارت میں آگ اتوار کی صبح 11 بجے لگی جس کی بروقت اطلاع دینے پر تقریباً 200 فائر فائٹرز نے آگ بجھانے کی کوشش کی اور 2 گھنٹے بعد ہی آگ پر قابو پالیا گیا۔

نیو یارک فائر ڈیپارٹمنٹ کے مطابق زیادہ افراد جھلسنے اور دم گھٹنے سے ہلاک ہوئے جبکہ ہلاک افراد کی تعداد میں اضافہ ہوسکتا ہے۔

ان کا کہنا تھا کہ سو سے زائد افراد آگ سے متاثر ہوئے ہیں جبکہ یہ آگ لیتھیم آئن بیٹری کے پھٹنے سے لگی۔ عمارت کا دروازہ کھلا تھا جس کے باعث آگ نے تیزی سے پوری عمارت کو اپنی لپیٹ میں لے لیا تھا۔

فائر ڈیپارٹمنٹ کے مطابق ہر منزل پر افراد موجود تھے جو دل اور سانس کی بندش کا شکار تھے تاہم تحقیقات کی جارہی ہیں۔

دوسری جانب نیویارک حکومت کی حکام کا کہنا تھا کہ وہ اس آگ سے خوفزدہ ہوگئی تھی، نیویارک کی پوری ریاست نیو یارک سٹی کے ساتھ کھڑی ہے۔

حکام کا کہنا تھا کہ وہ آگ سے متاثرہ افراد کو ہر ممکن مدد فراہم کریں گے اور متاثرین کو معاوضے کی ادائیگی کے لیے فنڈ قائم کیا جائے گا۔

واضح رہے کہ چند دن قبل فلاڈیلفیا میں آتشزدگی کا واقعہ پیش آیا تھا جس میں 12 افراد ہلاک ہوگئے ہیں جس میں 8 بچے بھی شامل ہیں۔