فیصل آباد میں تھانہ ٹھیکری والا کے علاقے چک بہتر گلابی پور میں شادی کی تقریب میں ہوائی فائرنگ ہوئی۔

تفصیلات کے مطابق فیصل آباد سے چک بہتر گلابی پور جانے والی بارات میں باراتیوں نے خوب چاؤ سے فائرنگ کی۔

اہل علاقہ کا کہنا ہے کہ فائرنگ کرنے والے نوجوانوں میں رانا زین اور رانا فرمان شامل ہیں۔

اہل علاقہ کے مطابق نوجوانوں نے فائرنگ کرتے ہوئے قانون کو خوب چیلنج کیا اور پولیس کاروائی نہ کر سکی۔

خیال رہے کہ شادی بیاہ کی تقریبات میں ہوائی فائرنگ سے 2 لڑکوں کے جاں بحق ہونے کے واقعات بھی رونما ہوچکے ہیں۔

واضح رہے کہ سی پی او غلام مبشر میکن کے احکامات پر شادی بیاہ کی تقریب میں ہوائی فائرنگ پر سخت پابندی عائد ہے۔

مزید پڑھیں: فیصل آباد: شادی کی تقریب میں فائرنگ سے 10 سالہ بچہ جاں بحق

 ہوائی فائرنگ کا رجحان دیہاتوں اور شہروں دونوں میں یکساں موجود ہے، کچھ عرصہ قبل سمجھا جاتا تھا کہ یہ غیر قانونی عمل کرنے والے ان پڑھ گوار صرف دیہاتی لوگ ہوتے ہیں، جہاں بندوقوں اور گولیوں کی دستیابی کوئی انوکھی بات نہیں۔

مگر چند سالوں میں یہ رجحان شہروں میں بھی کینسر کی طرح پھیل چکا ہے، اور اچھے خاصے خاندان کے پڑھے لکھے نوجوان بھی اس ناجائز عمل کا حصہ بن رہے ہیں، مگر ایک بات تو صاف ظاہر ہے کہ ہوائی فائرنگ کرنا کسی غریب کے بس کی بات نہیں، غریب تو اپنا پیٹ مشکل سے پالتا ہے، اس کے پاس اتنا پیسہ کہاں سے آئے گا کہ وہ کلاشنکوف اور گولیاں خریدے؟ یا فائرنگ کے فیسٹیول کروائے؟ یہ ناجائز عمل یقیناً امیروں کا ہی شوق ہے۔

خاص طور پر وہ امیر افراد جو بااثر بھی ہوں اور جنہیں اکثر پولیس یا انتظامیہ کی سرپرستی حاصل ہوتی ہے، تب وہ یہ جان لیوا عمل بغیر کسی ہچکچاہٹ کے کرتے ہیں۔